Аб ходзе рэканструкцыі малочнатаварных ферм у Быхаўскім раёне
Тры ытанні разгледзеў раённы выканаўчы камітэт на сваім пасяджэнні, якое вёў старшыня выканкама Дзмітрый Калееў. Але першым стаяла пытанне “Аб ходзе рэканструкцыі малочнатаварных ферм у Быхаўскім раёне”.
Намеснік старшыні райвыканкама па будаўніцтву Аляксандр Папкоў выклаў поўную інфармацыю аб будаўніча-мантажных работах па рэканструкцыі 8 МТФ. Іх ужо трэба было здаць у эксплуатацыю, але не змаглі. Значыць, не выканалі даручэнне Кіраўніка дзяржавы. А тую ж Лудчыцкую ферму планавалася здаць яшчэ 6 снежня. Цяпер жа гамонка ідзе пра 20 снежня…
У чым прычына такога адставання? Аб гэтым прама і спытаў дакладчыка Дзмітрый Калееў. Адказ паследаваў адназначны: галоўная прычына — недахоп фінансавых сродкаў. Да таго ж у шэрагу гаспадарак няма так званых прарабаў, якія б паўсядзённа займаліся будоўляю. У выніку яна пушчана на самацёк.
Дзмітрый Міхайлавіч з такою высноваю не пагадзіўся, асабліва калі высветліў, што на сённяшні дзень па раёне не асвоена на гэтыя мэты 21,8 мільярда рублёў бюджэтных грошай. Гэта зусім абуральны факт. А неасвоенныя грошы аддалі іншым раёнам, якія не толькі змаглі іх асвоіць, а і своечасова пабудаваць свае фермы.
Былі заслуханы тлумачэнні выконваючага абавязкі начальніка ўпраўлення сельскай гаспадаркі і харчавання райвыканкама Сяргея Красікава, дырэктара ААТ “Быхаўрайаграпрамзабеспячэнне” Уладзіміра Грудава, старшыні праўлення СВК “Валадарскі” Сяргея Акуленкі, іншых кіраўнікоў.
На дваіх кіраўнікоў вырашылі аформіць хадайніцтва ў вышэйстаячыя інстанцыі аб разглядзе іх знаходжання на займаемых пасадах.
Выканкам заслухаў таксама інфармацыю начальніка аддзела арганізацыйна-кадравай работы Таццяны Ермаліцкай аб рэзерве кадраў Быхаўскага раённага выканаўчага камітэта на 2014 год, начальніка аддзела жэканомікі райвыканкама Віктара Пугача — аб эфектыўнасці выкарыстання маёмасці, якая знаходзіцца ў раённай камунальнай уласнасці, размешчанай у горадзе Быхаве па вуліцы Чыгуначнай, 3.
Свае меркаванні па гэтых двух пытаннях Дзмітрый Калееў, член Савета Рэспублікі Нацыянальнага сходу Рэспублікі Беларусь Алена Круцько і першы намеснік дырэктара фонда “Магілёўаблмаёмасць” Вікторыя Васільева. Іх заўвагі, прапановы ўключаны ў прынятых выканкамам рашэннях.
Мікола КОЛАСАЎ.