Прэзідыум раённага Савета дэпутатаў: Заклікаем усіх прыняць удзел у працэсе пераўтварэння Быхаўскага краю
2013 год — знамянальны ў гісторыі нашага рэгіёна. Першага верасня Быхаўшчына будзе прымаць гасцей на рэспубліканскім свяце, якое ўвасабляе адзінства беларускага друкаванага слова і гісторыі нашага народа, яго цеснай сувязі са славянскімі вытокамі.
Гісторыя развіцця цывілізацыі пераканаўча сведчыць, што свята заўсёды было і застаецца моцным сродкам уздзеяння на духоўны свет чалавека.
Свята беларускага пісьменства найлепш адпавядае мэтам стварэння святочнай культуры, заснаванай на нацыянальнай традыцыі беларусаў, грамадзянскасці, выхавання нацыянальнай самасвядомасці.
Сёлетні Дзень беларускага пісьменства асаблівы, бо ён пройдзе ў Год беражлівасц — год, які будзе садзейнічаць росту якасці жыцця, беражлівых адносін да роднага краю, да тых багаццяў, якімі надзяліла нашу зямлю маці-прырода і якія створаны руплівымі рукамі яе сыноў і дачок. I таму беражлівасць павінна стаць спосабам жыцця. Свята, што праводзіцца ў гэты год, павінна паказаць усю глыбіню і самабытнасць беларускага народа, роднай культуры, мовы, ашчадныя адносіны да нашай спадчыны.
Каб свята прайшло паспяхова, нам спатрэбяцца намаганні сапраўдных творцаў, якія павінны адшукаць нетрадыцыйныя падыходы да сэрцаў гасцей. Галоўнае, каб у гэты адказны перыяд важнасць яго ўсвядоміў кожны жыхар горада і вёскі. Усе мы можам і павінны ўнесці асабісты ўклад у падрыхтоўку роднага краю да рэспубліканскага свята. Гэта перш за ўсё самаадданая праца кожнага з нас на працоўным месцы. I не толькі. Кожны гаспадар павінен прывесці ў парадак свой дом, тэрыторыю каля яго, пераўтварыць яе ў куточак прыгажосці, гасціннасці, добраўпарадкавання.
Спадзяемся, нашы жыхары, рыхтуючыся да сустрэчы гасцей, праявяць свядомасць, ініцыятыву, нераўнадушша да тых глабальных змен, якія чакаюць родны горад і раён.
Заклікаем усіх прыняць удзел у працэсе пераўтварэння Быхаўскага краю, зрабіць яго адным з самых утульных, прыгожых і добраўпарадкаваных рэгіёнаў нашай любімай Беларусі.
Прэзідыум раённага Савета дэпутатаў