Беларускі плывец Ігар Бокій, які на сёлетняй Паралімпіядзе ў Лондане заваяваў пяць залатых медалёў і адно серабро, марыць выступіць з камандай здаровых спартсменаў. Пра гэта ён паведаміў на сустрэчы з журналістамі ў прэс-цэнтры БЕЛТА.

— Гэта былі спаборніцтвы высокага ўзроўню, дзе былі створаны ўсе ўмовы для спаборніцтваў і адпачынку, — расказаў Ігар Бокій. — І мяне ўразіла стаўленне да Паралімпіўскіх гульняў. Там людзі гэтым спортам цікавяцца не менш, чым Алімпійскімі гульнямі.

Як зазначыў трэнер Ігара Генадзь Вішнякоў, трыбуны падчас выступленняў яго падапечнага былі запоўнены поўнасцю. У Ігара з’явіліся свае прыхільнікі, якія не прапускалі нават познія спаборніцтвы. А старшыня Паралімпійскага камітэта Алег Шэпель паведаміў што беларускаму спартсмену ўжо паступілі прапановы выступаць за зборныя Расіі і Азербайджана. Сам Ігар Бокій кажа, што рашэнне гэтага пытання поўнасцю залежыць ад яго трэнера.

Таксама стала вядома, што ўдзельнікі сёлетніх Парралімпійскіх гульняў, якія заваявалі ў Лондане медалі, будуць забяспечаны на бліжэйшыя чатыры гады мясной прадукцыяй ад кампаніі “Белатміт”.

— У нас ёсць дамоўленасць, што ўсе медалісты лонданскай Паралімпіяды будуць штомесяц на працягу чатырох гадоў атрымліваць па 10 кілаграмаў прадукцыі ад “Мясаграда”, — паведаміў Алег Шэпель.

У цэлым ён зазначыў, што хацелася б большага двухбаковага супрацоўніцтва са спонсарамі, але ахвотных пакуль што не так шмат, калі параўноўваць з Расіяй ці Украінай, дзе спонсарскае фінансаванне зусім на іншым узроўні. Гэта не адзіная праблема, якая існуе ў асяродку паралімпійскага руху. Недастача трэнерскіх кадраў тут таксама актуальная. У Міністэрстве спорту паралімпійскім рухам займаюцца толькі два дзяржаўныя трэнеры. Патэнцыял жа відавочны, калі нават глядзець на вынікі Паралімпіяды гэтага года, дзе беларуская каманда здабыла дзесяць узнагарод, сярод якіх тры сусветныя рэкорды плыўца Ігара Бокія.