Дыханне — найгалоўнейшая крыніца жыцця. Чалавек можа пражыць без ежы і вады некалькі дзён, але без паветра самае большае — некалькі хвілін.

Марское ўзбярэжжа. Марское паветра, вільготнае і насычанае мінераламі, паляпшае дыханне і ўзбагачае арганізм карыснымі рэчывамі. Таксама дабратворны для дыхання і хваёвы лес. Хвоя абеззаражвае паветра, ачышчае яго і напаўняе цудоўным водарам. Гуляць па такім лесе і дыхаць у ім на поўныя грудзі — задавальненне і велізарная карысць!

Плаванне. Плаванне не толькі гарманічна развівае цела і мышцы, але і стымулюе павелічэнне жыццёвай ёмістасці лёгкіх. У плыўцоў заўсёды добра развітая “дыхалка”. Але для стымуляцыі дыхання зусім не абавязкова падавацца ў прафесійны спорт — дастаткова рэгулярнага наведвання басейна.

Эфірныя алеі. Некаторыя эфірныя алеі, напрыклад, ментолавы або хвойны, спрыяюць паляпшэнню дыхання. У звычайным жыцці можна наносіць алей на водаралямпу, у выпадку прастуды выкарыстоўваць у інгаляцыі. Увага: некаторыя водары могуць выклікаць алергію!

Правільная пастава. Правільная пастава важная для адэкватнага кровазабеспячэння лёгкіх і адпаведна для нармальнага дыхання. Таму вельмі важна сачыць за паставай і пазваночнікам, штодня па раніцах рабіць гімнастыку і пабольш рухацца.

Вільготная прыборка памяшканняў. Як вядома, пыл, нават хатні, — наймацнейшы раздражняльнік і шкоднік для органаў дыхання. Менавіта таму вельмі важна рэгулярна праводзіць вільготную прыборку ў кватэры, выціраць пыл, мыць падлогу і актыўна праветрываць. Калі ў кватэры празмерна сухое паветра, можна набыць спецыяльны прыбор — увільгатняльнік. З падручных сродкаў для гэтай мэты можна выкарыстоўваць збаны з вадой, расстаўленыя па пакоі, або развешаныя мокрыя ручнікі.

ВОРАГІ.

Курэнне. Курэнне наносіць непапраўную шкоду дыхальнай сістэме, прычым не толькі актыўнае, але і пасіўнае. Дымячы цыгарэтай, вы не толькі атручваеце жыццё сабе, але і блізкім, асабліва дзецям. У курцоў развіваецца хранічны бранхіт, які значна ўскладняе дыханне. Даказана, што цыгарэты спрыяюць развіццю раку лёгкіх. Кідайце курыць!

Загазаванасць. Загазаванасць, запыленасць і іншыя забруджванні паветра небяспечныя для здароўя органаў дыхання. Часцінкі раздражняльных рэчываў асядаюць у лёгкіх, выклікаючы розныя немачы, пачынаючы з алергіі і заканчваючы бронхаэктазамі (неабарачальныя паталагічныя працэсы ў бронхах). Выратаваць ад гэтага можа толькі пераезд з забруджанага месца. Калі няма такой магчымасці, трэба часцей прымаць душ і прамываць нос.

Алергія. Алергічныя захворванні небяспечныя для дыхання. Справа ў тым, што на алерген арганізм рэагуе ацёкам слізістай носа (дыхаць праз нос становіцца немагчыма), а таксама спазмам бронхаў, што ўскладняе дыханне і праз рот. У цяжкіх выпадках алергія можа прывесці да ўдушша і спынення дыхання. Калі вы пакутуеце на алергію, трымайце напагатове антыгістамінныя сродкі.

Застаялае паветра. Застаялае паветра ў памяшканні багатае на вуглякіслы газ, а вось кіслароду ў ім замала. Такім паветрам нельга надыхацца, кроў недастаткова насычаецца кіслародам, адпаведна недаатрымліваюць яго і ўнутраныя органы. Менавіта таму ў любы час года, у любое надвор’е неабходна ў абавязковым парадку праветрываць памяшканне некалькі разоў на дзень.

Гіпадынамія. Маларухомы лад жыцця садзейнічае застою крыві ў малым лёгачным коле кровазвароту. Гэта прыводзіць да цяжкага дыхання і задышкі (адчування недахопу паветра). А вось веславанне, хада на лыжах і валейбол цудоўна развіваюць лёгкія і стымулююць дыханне.