У рэдакцыю “Маяка Прыдняпроўя” нядаўна звярнулася жыхарка Мінска Валянціна Воранава з балючым для яе і, як яна ведае, для многіх землякоў, пытаннем. Справа ў тым, што яе, ураджэнку вёскі Новы Быхаў, куды яна пастаянна прыязджае да родных і сваякоў, адпачыць у роднай хаце памерлых ужо бацькоў, вельмі хвалююць кепскія адносіны пэўных людзей да прыроды любімага краю. Асабліва гэта тычыцца такога маляўнічага куточка, можна сказаць, жамчужыны нашага Прыдняпроўя, як возера Затока.

—Я нарадзілася і вырасла ў доме па вуліцы Азёрнай, што як раз і пятляе ўздоўж дняпроўскіх круч насупраць гэтага вадаёма і ягоных ваколіц, — распавяла Валянціна Ягораўна. — З дзяцінства добра памятаюцца чысціня і асаблівасць гэтых мясцін. Мясцовыя людзі ў большасці сваёй з павагай і любоўю адносіліся да непаўторнай Затокі.

Але цяпер мае месца і іншае. Рыбакі і адпачываючыя прыязджаюць сюды на аўтамабілях, паркуючыся літаральна на ўлонні гэтых запаведных мясцін. Нярэдка пакідаюць пасля сябе смецце, хоць для ягонага збору ёсць спецыяльныя месцы і скрынкі. Некаторыя неахайныя аматары рыбалкі разбіраюць рыбу проста на беразе, забруджваючы яго адыходамі, што можа прывесці да наступстваў санітарна-эпідэміялагічнага характару  А гэта ж — зона адпачынку, дзе людзі купаюцца і бавяць вольны час. Сапраўдным ударам па экалогіі і красе месца з’яўляецца таксама стыхійнае распальванне вогнішчаў.

Я сама неаднойчы папярэджвала неахайных аматараў прыроды, разам з землякамі прыбірала за імі бруд. Мясцовая ўлада ведае аб гэтых праблемах, робіць шмат чаго, але ёй патрэбна дапамога адпаведных прыродаахоўчых і іншых служб.

У раённай інспекцыі прыродных рэсурсаў і аховы навакольнага асяроддзя, куды я патэлефанаваў пасля візіту Валянціны Воранавай, ведалі пра сутнасць абмаляваную кабетай сітуацыі. Інспекцыя прадпрымала раней пэўныя захады па рэалізацыі сваіх паўнамоцтваў па ахове прыроды менавіта ў дадзеным рэгіёне. Разам з тым, паабяцалі яшчэ раз разабрацца на месцы і паведаміць рэдакцыі пра вынікі разбіральніцтва.

Як паведаміў начальнік райінспекцыі Аляксандр Жалабкевіч, праз колькі дзён ён выехаў у Новы Быхаў, дзе разам са старшынёю сельвыканкама Вячэславам Сідарэнкам сустрэўся з заяўніцай. Прадстаўнікі ўлады распавялі пра стан спраў па дадзенай праблеме, пра захады, у тым ліку прафілактычнага і адмістрацыйнага характару, якія будуць прадпрымацца па яе рэалізацыі.

На суботніку, які адбыўся 15 верасня, работнікі прыродаахоўчай інспекцыі ўзялі асабісты ўдзел у навядзенні парадку на тэрыторыі, прылягаючай да возера Затока. Ва ўборцы прыбярэжнай да Дняпра паласы ў рамках акцыі “Блакітны тыдзень” удзельнічалі таксама і работнікі мясцовых арганізацый.

Іван Мікалаеў.