Магазін “Халстаўчанка”, які належыць Быхаўскаму хлебазаводу, недахопу ў пакупніках не адчувае, бо тут прадаюцца насельніцтву не толькі тавары паўсядзённага попыту, а і ўся прадукцыя, якую вырабляе названае прадпрыемства. Да таго ж ёсць кніга заказаў, дзе пакупнік можа даць заяўку на выпечку вясельнага караваю, альбо торты да дня нараджэння.

Прадаўцамі тут Наталлья Бычкова і Таісія Бутамёнак (на здымку). Яны пастаянна выконваюць планы тавараабароту, хоць паблізу знаходзіцца сельмаг райспажыўтаварыства. Але ён у баку ад дарогі. Не адразу, асабліва з салона аўтамабіля, яго і заўважыш. Гэты ж стаіць паблізу дарогі, і ўсе, каму трэба, спыняюцца, заходзяць, купляюць. Дарэчы, свае планы тавараабароту, па словах Натальі Васільеўны, сельмаг таксама выконвае. Значыць, яны адзін аднаму працаваць не перашкаджаюць.

Нараканняў на ўмовы працы, забеспячэнне “Халстаўчанкі” патрэбнымі таварамі ў прадаўцоў няма. Тут усё добра. А вось калі загаманілі аб асабістым жыцці, то настрой у Бычковай стаў далёка не той, які быў дагэтуль. Аказваецца, жыве жанчына ў доме №23, у двухпакаёвай кватэры без ніякіх зручнасцей. Адна выхоўвае дзяўчынку, як апякун. У вёсцы Хутар жыве 80-гадовая маці Бычковай. Яна мае патрэбу ў доглядзе, але ў дачкі няма такой магчымасці, бо працуе, узяць старую да сябе не можа таксама, паколькі нават туалет знаходзіцца на вуліцы.

Дом гэты знаходзіцца на балансе УКП “Жылкамгас”. Астатнія дамы, разлічаныя на некалькі сем’яў, таксама. У адным з іх хоча жанчына атрымаць сабе лепшую кватэру, да якой падводзіцца вадаправод, а сваю здаць, бо яна не прыватызаваная. Звярталася ў мясцовы сельвыканкам. Але станоўчага адказу на свой зварот не атрымала.

—Гэтая апякунская сям’я не мае права на атрыманне сацыяльнага жылля, — сказала мне ў тэлефоннай размове кіраўнік спраў Холстаўскага сельвыканкама Ірына Нікалаева. — Да таго ж гэта не наша жыллё, а жылкамгаса…

Жыллёвая праблема Бычковай пакуль не вырашаецца, патрэбная ёй кватэра па-ранейшаму пустуе, хаця жыццё паказвае, што такіх невырашальных жыллёвых праблем, тым болей у сельскай мясцовасці, няма. Варта толькі тым, ад каго залежыць, вельмі захацець яе вырашыць.

Мікола КОЛАСАЎ.