У мінулы чацвер мы ў чарговы раз пераканаліся, што быхаўчане цікавяцца жыццём свайго горада. Звяртаючыся на “прамую лінію” рэдакцыі, яны выказалі думкі па самых розных пытаннях.
Адзін чалавек пацікавіўся лёсам будынка былога камбіната бытавога абслугоўвання насельніцтва па вуліцы Леніна, каля райунівермага. Ён стаіць без вокнаў і дзвярэй, без даху, а колькі будзе стаяць яшчэ — невядома.
Другі чалавек  параіў тым людзям, ад якіх гэта залежыць, адрамантаваць святлопаказальнік часу і тэмпературы паветра на фасадзе Дома быту з левага боку, побач з шыльдаю МТС. Раней ён працаваў (дарэчы, адзіны ў горадзе!), а цяпер — не, хаця карысць ад яго відавочная.
Былі нараканні на асвятленне гарадскіх вуліц. Нават уваход ад дарогі з вуліцы Сацыялістычнай у двор дзіцячага садка “Бярозка” не асвятляецца. Называліся таксама іншыя хібы гарадскога асвятлення. Напрыклад, пешаходнай дарожкі з вуліцы імя Максіма Багдановіча праз сквер у напрамку прыпынку каля раённай бальніцы.Там адзін ліхтар зламаны зусім, а астатнія не свецяць. Перагарэлі, напэўна, лямпы. І яшчэ летась. Свецяць ліхтары, як не дзіўна, далей ад дарожкі, там, дзе людзі не ходзяць.

Мікола КОЛАСАЎ