У спаборніцтве экіпажаў збожжаўборачных камбайнаў раёна першымі пераадолелі тысячны рубеж па намалоту зерня камбайнеры СВК “Валадарскі” Уладзімір Панцэр (на здымку №1 — злева) і Аляксандр Шынялёў. Скарыстаўшы вельмі спрыяльнае надвор’е мінулых выхадных, высокую ўраджайнасць хлебнай нівы, яны напрыканцы працоўнага дня, у нядзелю, дасягнулі гэтага выніку.
Зранку ў панядзелак з важкай працоўнай перамогай у полі іх павіншаваў першы намеснік старшыні, начальнік упраўлення сельскай гаспадаркі і харчавання райвыканкама Алег Грудаў. Ён уручыў перадавікам жніва Падзякі райсельгасхарчу і райкама прафсаюза работнікаў аграпрама, каштоўныя падарункі.

Такога ж ушанавання ўдастоіўся і вадзіцель СВК “Следзюкі” Аляксандр Саўкін (здымак №2), які яшчэ на мінулым тыдні выйшаў на другую тысячу перавезенага збожжа. На збожжавым таку ў аграгарадку Грудзінаўка яго віншавала і ўручыла ўзнагароды старшыня райкама прафсаюза работнікаў АПК Наталля Мірончык.

У той жа дзень з яе рук атрымалі заслужаныя ўзнагароды таксама вадзіцелі-тысячнікі Ігар Мінчанкоў з УКСП “Саўгас “Вараніно” і Юрый Самалётаў з філіяла “Макранскі” ААТ “Быхаўскі КАСЗ”.

Мікалай Ахрыменя.