З поглядам у будучыню
Настаўніца беларускай мовы і літаратуры ў ДУА “Лудчыцкі ВПК дзіцячы сад – сярэдняя школа” Тамара Лацапнёва не толькі вучыць роднай мове школьнікаў, а і другі год з’яўляецца кіраўніком этнаграфічнага музея.
Функцыянуе гэты музей у школе з 1998 года. У ім 197 экспанатаў асноўнага фонду і 36 – дадатковага. Аснову музейнай экспазіцыі складае інтэр’ер сялянскай хаты, у якой прадстаўлены шматлікія прадметы сялянскага побыту: гліняны посуд, лапата для выпякання хлеба, грэбень для часання льна, калаўрот і шмат чаго іншага. Сярод экспанатаў – вялікая калекцыя вышытых абрусаў, ручнікоў.
Вучні наведваюць музей на пазакласных мерапрыемствах, у час беларускіх святаў, як, напрыклад, “Вячоркі”. На экскурсіі прыязджаюць і вучні іншых школ.
Тамара Рыгораўна адзначае, што вельмі важна расказваць дзецям пра іх прадзедаў, захоўваць тое нямногае, што засталося, і па магчымасці працягваць збор патрэбных матэрыялаў. Школьнікі з задавальненнем наведваюць музей, разглядаюць экспанаты, бо многія з іх прынеслі самі, знайшоўшы некаторыя ў хатах сваіх бабуль і дзядоў.
У музеі таксама можна ўбачыць панараму вёскі Лудчыцы, якую дзяўчаты і хлопцы зрабілі самі. У будучыні менавіта такой школьнікі жадалі б бачыць сваю вёску. Тут запланаваны нават бальніца, гіпермаркет.
Акрамя гэтага Тамара Лацапнёва займаецца з дзяўчынкамі ў гуртку “Майстрыха”. На занятках школьніцы вырабляюць розныя падзелкі (на здымку).
Кацярына СВІРЫДЗЕНКА.