Провады зімы ў Быхаве
Нядзельны дзень 24 лютага па змене надвор’я выдаўся якраз падобным развіццю сюжэта тэатралізаванага прадстаўлення “Бывай, матухна-зіма”, што ладзілі на Кастрычніцкай плошчы райцэнтра работнікі культуры. Ранак з даволі моцным марозам і халодным ветрам быў тыпова зімовым, а абед з цёплым сонцам і капяжом надта ж ужо нагадваў вясну.
Так было і ў пастаноўцы, дзе спачатку перамагалі злыя сілы (чэрці, Лясун, завірухі-мяцеліцы) на чале з валадаркаю Зімою. Тая ніяк не хацела сыйсці, бо каляндар ёй — не ўказ. Але добрыя сілы, якіх прадстаўлялі скамарохі, Снежны волат і іншыя персанажы і якіх узначальваў Іван Царэвіч, у выніку ўсё ж перамаглі нечысць. Яны вывелі ў свет доўгачаканую вясну і яе дочку Ульянку, якая стала каханкаю Івана Царэвіча.
Паглядзець казачнае прадстаўленне, вялікую канцэртную праграму, а таксама наведаць гандлёвыя рады, паўдзельнічаць у разнастайных конкурсах, гульнях на плошчы ды стадыёне прыйшлі быхаўчане і госці горада. Работнікі прадпрыемстваў грамадскага харчавання прапанавалі наведвальнікам традыцыйныя для гэтага свята шашлыкі, бліны — сімвалы нараджаючагася сонца, а таксама шырокі выбар іншых прадуктовых тавараў.
Сваю мясную, пладовую і гародніную прадукцыю прадаваў філіял “Макранскі” ААТ “Быхаўскі КАСЗ”.
Гульнявыя і конкурсныя пляцоўкі арганізавалі для дзяцей і дарослых работнікі культасветустаноў, раённага цэнтра дзіцячай творчасці, аддзела па фізічнай культуры, спорту і турызму райвыканкама.
На заснежаным гарадскім стадыёне вялікім попытам ва ўдельнікаў свята карысталіся паслугі катання на запрэжаных у сані конях.
З імправізаванай сцэны гучалі песні народнай і абрадавай тэматыкі народных калектываў “Гаспадыня”, “Багатуха”, “Дняпроўскія зоры”, а таксама шэрагу самадзейных выканаўцаў.
Кульмінацыяй свята сталася, як заўсёды, спальванне на абрадавым вогнішчы стылізаванага чучала Зімы і непатрэбных людзям рэчаў, якія сабралі ў іх скамарохі, і што сімвалізавала сабою ачышчэнне ад усяго старога, зімовага і прыход новага, веснавога жыцця.
Мікалай Ахрыменя.
