Выніковая экспазіцыя Магілёўскага аддзялення Беларускага саюза мастакоў уключае ў сябе больш за 100 твораў жывапісу, скульптуры, графікі і дэкаратыўна-прыкладнага мастацтва. Праект «Дрэва жыцця» — своеасаблівая справаздача творчых асоб Прыдняпроўскага краю. У выставачных залах мастацкага музея імя Масленікава экспануюцца творы магілёўскіх мастакоў за апошнія 5 гадоў. Прадстаўленыя работы адлюстроўваюць усе віды і жанры выяўленчага мастацтва. Мастакі розных пакаленняў прадстаўляюць не толькі свой творчы вопыт, але і тэматычны дыяпазон і пераасэнсаванне традыцый. Як адзначыла намеснік дырэктара абласнога мастацкага музея імя Масленікава Святлана Строгина, на экспазіцыі прадстаўляюць свае творы нават цэлыя творчыя дынастыі магілёўскіх мастакоў.

Назва выставы «Дрэва жыцця» — сімвалічная для творчасці магілёўскіх майстроў, — лічыць мастачка Галіна Конанава. І не толькі таму, што ў экспазіцыі таксама прадстаўлена работа пад аднайменнай назвай скульптара Андрэя Вараб’ёва. Дрэва Жыцця ў міфалогіі ўсіх еўрапейскіх народаў сімвалізуе сувязь зямлі і неба. Так і людзі мастацтва ў сваіх творах імкнуцца ад зямнога да вышэйшага, лічыць Галіна Конанава.

Свае работы на выставе прадстаўляюць каля 20 мастакоў, графікаў і скульптараў. Сярод іх і вядомы магілёўскі скульптар Уладзімір Конанаў. Зараз ён ужо працуе над новым праектам: спробай увасобіць у скульптуры паэзію Янкі Купалы і Якуба Коласа. Адкрыццё выставы

«Дрэва жыцця» — вельмі важная падзея ў культурным жыцці Магілёўшчыны. Яна сведчыць пра тое, што творчыя асобы нашага краю уносяць ў скарбніцу беларускага мастацтва тутэйшую самабытнасць і непаўторную эмацыйную афарбоўку сваіх твораў.

Радио Могилев