У Магілёве з сольным канцэртам выступіў гурт Naka

5 декабря 2011 13:47

У першы зімовы ўікэнд у Магілёве з сольным канцэртам выступіў мінскі гурт Naka. Адбылося мерапрыемства ў клубе Cuba. Наста Шпакоўская прадставіла магілёўскай публіцы вялікую праграму з новых песняў і правераных часам хітоў. На разагрэве ў мінчан выступілі музыкі з гурта «Неавстралия».

Вакалістка маладога магілёўскага калектыву «Неавстралия» з усіх сіл спрабавала завесці залу – заклікала публіку на танцпляц і паказвала, як трэба адрывацца. Канцэрт, на здзіўленне, пачаўся своечасова, таму народу ў клубе спачатку было няшмат – магілёўцы прывыклі, што канцэрты ў горадзе пачынаюцца з моцным спазненнем. Так што ў «Кубе» было халаднавата і даволі пуста, аднак да канца выступу «Неавстралии» народ пачаў сагравацца, і да выхаду на сцэну мінскіх гасцей танцпляц быў практычна запоўнены.

Гурт Naka магілёўцы сустрэлі апладысментамі, і да канца мерапрыемства ўдзячная публіка купала ў авацыях Насту і кампанію. Тыя, трэба прызнаць, выкладваліся па поўнай праграме. Новыя песні чаргаваліся кампазіцыямі са студыйных альбомаў гурта. Зала хорам падхоплівала знаёмыя радкі «Да, мой герой – это Таня Буланова», «Тебе 40, а мне 20», «Впереди еще дорога» і іншыя. Ды і свежыя рэчы заходзілі на ўра, нягледзячы на тое, што ў некаторых з іх тэксту не памятала нават сама вакалістка, так што даводзілася карыстацца шпаргалкай.

Насту Шпакоўскую ў Магілёве чакалі ўжо даўно, аднак гурт у горадзе вядомы не ўсім, таму раней на канцэрты «Накі» папросту не маглі прадаць квіткі. Вельмі прыемна, што гэтым разам канцэрт усё ж адбыўся – упэўненыя, зараз Наста будзе прыязджаць у Магілёў часцей. Канцэрт спадабаўся ўсім прысутным.