На Рыначнай плошчы Быхава адбыліся чарговыя восеньскія кірмашы па продажу сельскагаспадарчай прадукцыі
У мінулыя суботу і нядзелю на Рыначнай плошчы горада адбыліся чарговыя восеньскія кірмашы па продажу сельскагаспадарчай прадукцыі.
…Нядзельны ранак пачаўся невялікім дожджыкам, каторы не вельмі напужаў пакупнікоў, і яны патроху збіраліся каля прылаўкаў прадаўцоў з ліку работнікаў сельскагаспадарчых прадпрыемстваў, фермераў і прыватных гаспадароў. Самая шматлюдная чарга назіралася каля гандлёвай кропкі УКСП “Саўгас “Вараніно”, дзе бойкім чынам ішоў продаж свініны і ялавічыны. Быхаўчанка Лідзія Грышчанка і жыхарка аграгарадка Няраж Антаніна Лубянкова, якія набылі прадукцыю гаспадаркі, адзначылі яе добры таварны від, прымальны кошт і паспадзяваліся на адпаведныя смакавыя якасці мяса.
Гандлявалі мясам і каля другіх прылаўкаў, у прыватнасці работнікі СВФ “Лудчыцы” ААТ “Быхаўрайаграпрамтэхзабеспячэнне”, СВК “Валадарскі”, “Навабыхаўскі”, прадпрымальнік Нікіфараў з Дунайка. Шырокім асартыментам як дзяржаўныя, так і прыватныя вытворцы прадставілі на кірмашы прадукцыю садоў і агародаў. Ёю гандлявалі філіял “Макранскі”, фермерская гаспадарка “Азараў” з Палянінавіч, арэндатары з Доўска Рагачоўскага раёна, прыватны гаспадар з аграгарадка Лудчыцы. Не было аніякіх праблем у быхаўчан тым днём купіць таксама бульбу, прытым добрай таварнай якасці ды па параўнальна таннай цане.
А вось збожжа, лічы, у продажы не было, бо прывезлі яго толькі УКСП “Саўгас “Вараніно”, ды і тое ў невялікай колькасці, і якое раскупілі літаральна за лічаныя хвіліны, а СВК “Навабыхаўскі” гандляваў толькі аўсом. Як выявілася ў размовах з пакупнікамі, у прыватнасці з быхаўчанкаю Аленаю Кудакцінаю, жадаючых купіць збожжа, асабліва ў якасці корму для курэй, ужо каторы час на рынку шмат, а вось прапановы з боку гандлёвых, сельскагаспадарчых арганізацый зусім слабыя.
Карыстаюцца такім момантам спрытныя прыватныя гандляры рынка, якія прадаюць, да прыкладу, мяшок пшаніцы ўжо па 150 тысяч рублёў і болей, уздымаючы цану мінімум у паўтара раза.
У гаспадарках, райсельгасхарчы тлумачаць сітуацыю невысокім ураджаем збожжавых сёлета, неабходнасцю разлікаў ім за тэхніку, угнаенні і гэтак далей, але такія аргументы будуць, бадай, слабымі для тых жа самых пажылых быхаўчанак, з якімі гутарыў на кірмашы і для якіх трыманне курэй з’яўляецца істотным жыццёвым падспор’ем. На іхнюю думку, прапанаваць для продажу гараджанам дзесятак-другі тон збожжа ўсе гаспадаркі раёна разам усё ж могуць здолець.
Мікалай Ахрыменя.