Купалле з’яўляецца адным з самых шанаваных святаў у беларусаў, якое дайшло да нас з самай далёкай гісторыі народа. У глыбокай старажытнасці яно было неадрыўна звязана з культам адроджанага Сонца і сімвалізавала ў сваіх абрадах імкненне людзей да большай урадлівасці палеткаў, павышэнне прыплоду жывёлы, росквіту жыцця самаго народа.

Усё гэта сведчыла тысячагоддзямі і да гэтага часу ў пэўнай ступені сведчыць аб ягоным моцным маральна-энергетычным уздзеянні на людзей, якое і адчулі шматлікія ўдзельнікі купальскага свята, што сабраліся нядзельным вечарам 6 ліпеня на Кастрычніцкай плошчы Быхава.

Пачалося яно з тэатралізаванага прадстаўлення, якое падрыхтавалі ды ладзілі работнікі і самадзейныя артысты Цэнтра культуры, народнай творчасці і рамёстваў у мікрараёне Быхаў-1. Лейтматывам яго сталася праслаўленне праз вобразы Купаліча, Купалінкі ды іхніх чатырох памочніц асноўных добрых якасцяў і рысаў нашага народа — працавітасці, шчырасці, шчодрасці ды гасціннасці. Дзейства суправаджалася песенна-музычным афармленнем купальскай тэматыкі ў выкананні народнага калектыву “Дняпроўскія зоры”.

Затым шматлікія гараджане ды госці акружылі купальскі касцёр, які ярка ўспыхнуў сярод ужо надыйшоўшай купальскай ночы. Ягонае полымя асвятляла радасныя твары людзей у карагодзе і, здавалася, сапраўды ачышчала іхнія целы ад хвароб, а душы — ад зайдрасці, злосці ды іншых непрыемнасцяў паўсядзённага жыцця…

Мікалай ІВАНОЎ.