У Быхаве адбыўся семінар-нарада па пашырэнні і папулярызацыі сістэмы адзінай разліковай інфармацыйнай прасторы
У райвыканкаме адбыўся семінар-нарада па пашырэнні і папулярызацыі безнаяўных разлікаў і сістэмы адзінай разліковай інфармацыйнай прасторы. У зале прысутнічалі прадстаўнікі банкаў, гандлю, і індывідуальныя прадпрымальнікі і інш. Вёў пасяджэнне намеснік старшыні раённага выканаўчага камітэта Канстанцін Тверыцін.
З дакладамі перад аўдыторыяй выступілі намеснік начальніка Галоўнага ўпраўлення Нацыянальнага банка Рэспублікі Беларусь па Магілёўскай вобласці Сяргей Кавалёў і вядучы спецыяліст эканамічнага ўпраўлення Сяргей Гаваруноў. На першае мая 2014 года на тэрыторыі раёна ўсталяваны 217 плацёжных тэрміналаў. За кошт сродкаў ААТ “ААБ Беларусбанк” пастаўлены 150 плацёжных тэрміналаў, ААТ “Белаграпрамбанк” – 55, за кошт сродкаў прадпрымальнікаў – 12. У раёне ўведзены ў дзейнасць 19893 карткi, з іх 12508 належаць ААТ “ААБ Беларусбанк”, ААТ “Белаграпрамбанк” – 7385 адзінак, функцыянуюць 7 банкаматаў, 9 інфакіёскаў.
Сярэдняя нагрузка на адзін банкамат складае 2842 карткi пры прадугледжанай норме 2600, на адзін плацёжны тэрмінал – 92 карткi (аптымальная нагрузка – не больш за 160).
Рознічны тавараабарот раёна ў першым квартале гэтага года, атрыманы ў выніку разлікаў з выкарыстаннем банкаўскіх плацёжных картак, склаў 12,9 млрд руб., што складае 12,5 працэнта да рознічнага тавараабароту гандлю і грамадскага харчавання (па вобласці – 15,6 працэнта). Прырост да пачатку года склаў 1,6 працэнтнага пункта.
На семінары разглядаліся прычыны нізкага росту безнаяўных плацяжоў, шляхі іх павелічэння пры дапамозе банкаўскіх плацёжных картак, фінансавай адукацыі насельніцтва і інш.
Асноўныя прычыны нізкага росту безнаяўных разлікаў абумоўлены нізкай інфармаванасцю насельніцтва аб магчымасцях інтэрнэт-банкінга і м-банкінга, адсутнасцю ў раёне лаялці-праектаў па прадастаўленні скідак трымальнікам картак пры безнаяўных разліках у гандлёвых аб’ектах.
Работнікамі банкаў праводзяцца навучальныя семінары ў працоўных калектывах, вучэбных установах горада і раёна.
Аб праведзенай рабоце расказаў намеснік дырэктара ЦБУ № 706 філіяла № 700 ААТ “ААБ Беларусбанк” Аляксандр Пракапенка. Прысутныя задавалі выступоўцам актуальныя пытанні, выказалі прапановы наконт зніжэння эквайрынгу.
