Тэатр з Варшавы ў Быхаве
Да быхаўчан завітаў калектыў, які пазнаёміў гараджан з тэатрам лялек для дарослых. Гэта славутая ў Еўропе акцёрская асацыяцыя “Унія Тэатр Немагчымы” з Польшчы.
Палякі наведалі наш горад у межах Міжнароднага фестывалю тэатра лялек і анімацыйных фільмаў для дарослых “Лялька таксама чалавек”. Гэты фэст вандруе па свеце ўжо восьмы год —фэст, які аб’ядноўвае тэатр, анімацыю і хоча даказаць, што гэтыя два віды мастацтва могуць быць не толькі “дзіцячымі”.
Шкада, але госці прыехалі да нас толькі на адзін дзень. На сцэне Дома культуры мікрараёна Быхаў-1 гледачы ўбачылі спектакль-імпрэсію па п’есе Збігнева Герберта “Другі пакой”. Праваблівала тое, что адыгралі яго акцёры з Варшавы на беларускай мове. Дыялогі гучалі нібыта на фоне карцін. На сцэне – павялічаныя да іх памераў фотаздымкі.
Польскі тэатр незвычайны яшчэ тым, што ён не развітваецца з гледачамі адразу пасля спектакля. Наведвальнікаў запрашаюць таксама на паказ анімацыйных фільмаў. І казка для дарослых пра-цягваецца.
Для аматараў тэатра госці падрыхтавалі прагляд фільмаў студыі “Се-ма-фор” – самай старэйшай і вядомай у Польшчы, якая атры-мала два анімацыйных “Оскары”, і “Серафіньскі”, з якой супрацоўнічаюць самыя таленавітыя аўтары.
Як паведаміў дырэктар, рэжысёр і сузаснавальнік “Уніі Тэатр Немагчымы” Марэк Хадачыньскі, фестываль “Лялька таксама чалавек” фінансуе гарвыканкам Варшавы. Часам сродкі выдаткоўваюць Міністэрства культуры і нацыянальнай спадчыны Польшчы іншыя ўплывовыя структуры.
З 2006 года, калі нарадзіўся фестываль, у ім паўдзельнічалі тэатральныя калектывы прыкладна з 50 краін, у тым ліку і Беларусі. Спектаклі з усяго свету ацэньвае міжнароднае журы.
Наконт беларускай мовы ў спектаклі “Другі пакой” рэжысёр і актрыса тэатра Дарота Ганна Донбэк патлумачыла, што “…калектыў іграе на розных мовах. Мы адкрыта не кантактуем з гледачамі. Можам нават папрасіць дапамогі акцёраў той краіны, якую наведваем”.
“Унія Немагчымы тэатр» — акцёрская асацыяцыя, якая спалучае разнастайныя жанры. У яе таксама ўваходзяць мастацкія майстэрні, яна займаецца арганізацыяй канцэртаў класічнай музыкі.
З Быхава польскі тэатр лялек накіраваўся ў абласны цэнтр.
Сяргей АНДРЭЕЎ.
