Напярэдадні Дня Незалежнасці Рэспублікі Беларусь ліквідатары наступстваў катастрофы на Чарнобыльскай АЭС усклалі кветкі да памятнага знаку “Землякам — ліквідатарам аварыі на ЧАЭС” і “Пацарпелым ад катастрофы на Чарнобыльскай АЭС”.

У цырымоніі ўдзельнічалі галоўны спецыяліст аддзела ідэалагічнай работы, культуры і па справах моладзі райвыканкама Раман Галынскі, намеснік начальніка па ідэалагічнай рабоце і кадравым забеспячэнні АУС райвыканкама Сяргей Пімаеў і старшыня раённай арганізацыі РГА «Беларускі саюз ваенных маракоў” Аляксандр Цярэшка.

Затым узнагародзілі ветэранаў органаў унутраных спраў, якія ў далёкім 1986 годзе знаходзіліся па абавязку службы ў зоне адчужэння, якая найбольш пацярпела ад радыяцыі.

Маёр міліцыі Сяргей Пімаеў уручыў юбілейныя медалі «35 гадоў ліквідацыі аварыі на ЧАЭС» Мікалаю Казюльку, Леаніду Гусакову, Уладзіміру Істрацькову, Мікалаю Балакісу, Юрыю Агінскаму і Віктару Арлоўскаму. Пасля на закладзенай каля памятнага знака алеі Памяці актывісты-ліквідатары пасадзілі некалькі туй, якія набыў за ўласныя сродкі маёр міліцыі ў адстаўцы Мікалай Казюлька.

Мерапрыемства завяршылася ўрачыстым падпісаннем заявы аб уваходжанні Быхаўскай раённай грамадскай арганізацыі ліквідатараў наступстваў катастрофы на ЧАЭС у структуру рэспубліканскага грамадскага аб’яднання ліквідатараў, інвалідаў Чарнобыльскай катастрофы “Ветэраны Чарнобыля”.

Сяргей АНДРЭЕЎ.