Актывісты БРСМ і члены ініцыятыўных груп правялі акцыю «Моладзь вырашае!» у падтрымку маладых кандыдатаў у дэпутаты ў раённы Савет.

Грамадска-палітычнае мерапрыемства стартавала на вуліцы Пралетарская каля СШ №3 г. Быхава, а завяршылася каля філіяла ААТ «Булачна-кандытарская кампанія «Дамачай», які знаходзіцца на вуліцы Чырвонаармейская.

Прахожым хлопцы і дзяўчаты раздавалі памяткі «Маладому выбаршчыку», а таксама прапаноўвалі напісаць свае пажаданні будучым народным абраннікам. На заклік людзі пагаджаліся даволі ахвотна, кідаючы ўлёткі ў спецыяльную скрыню. Пазней гэтыя пажаданні гараджан плануецца перадаць прадстаўнікам дэпутацкага корпуса.

Свае пажаданні пакінула работнік цэнтральнай райбальніцы Таццяна Раслякова: будучым дэпутатам – нестандартнага падыходу ў вырашэнні розных праблем і крэатыўнага мыслення.

Лідар быхаўскай моладзі Маргарыта Галіноўская лічыць, што ўдзел моладзі ў грамадска-палітычных працэсах вельмі важны. Менавіта на выбарах адбываецца сутыкненне палітычных і эканамічных інтарэсаў розных груп. Таму трэба дамагацца абрання годных кандыдатаў. Кожнаму маладому чалавеку неабходна праявіць сваю актыўную грамадзянскую пазіцыю, ведаць выбарчыя працэдуры, умець прааналізаваць перадвыбарныя праграмы будучых выбраннікаў. Шмат у чым ад гэтага залежыць, як будзе развівацца наш раён.

Сяргей АНДРЭЕЎ.