ПЕРАМОГА

На рэспубліканскім аглядзе-конкурсе прафесійнага майстэрства сярод дзяржаўных інспектараў па энергетычным наглядзе Быхаўская раённая энергаінспекцыя атрымала перамогу як лепшая энэргаінспекцыя і ўзнагароджана адпаведным Дыпломам. Яе начальнік Барыс Гернеза годна паказаў сваё майстэрства ў веданні прававых актаў, схем энергазберажэння, выяўленні парушэнняў нормаў эксплуатацыі і тэхнічнага стану энергаўстановак.

ЗНІЗЬЦЕ ХУТКАСЦЬ!

З 8 па 18 чэрвеня на аўтамагістралі М-8 на 273-400 км (у раёне аграгарадка Следзюкі) з 8.00 да 20.00 будзе працаваць мабільны датчык кантролю хуткасці. Нагадваем, хуткаснае абмежаванне на дадзеным участку дарогі для легкавых і грузавых транспартных сродкаў складае 60 км/г.

МЕДЫЦЫНА І МАЛЮНАК

Магілёўскі абкам прафсаюза работнікаў аховы здароўя падвёў вынікі абласнога этапу конкурсу дзіцячага малюнка “Медыцына вачамі дзяцей”. У ліку пераможцаў — тры навучэнкі Быхаўскай дзіцячай школы мастацкіх рамёстваў. Дыпламантамі I ступені сталі Анастасія Краўцова і Яўгенія Івашка. III месца дасталася Арыне Патапенка. Работы пераможцаў накіраваны ў Рэспубліканскі камітэт Беларускага прафсаюза работнікаў аховы здароўя для ўдзелу ў фінале конкурсу.

ПРЭЗЕНТАВАЛІ БЫХАЎШЧЫНУ

Быхаўчане сталі ўдзельнікамі Міжнароднага фестывалю “Залатая пчолка”, які праходзіў у Клімавічах. У рамках свята “Фестывальная краіна — краіна сяброў” нашы прадстаўнікі ўстаноў культуры, клубнай сістэмы, а таксама выкладчыкі і выхаванцы Быхаўскай ДШМР прадставілі выставачныя экспазіцыі беларускага побыту, рэгіянальны касцюм, фальклорную і гульнявыя праграмы, майстар-класы народнага бытавога танца, прэзентавалі работы майстроў дэкаратыўна-прыкладнога мастацтва.