На рэспубліканскім п’едыстале

12 раз зборная каманда лесаводаў Магілёўскай вобласці займае першае месца ў рэспубліканскай зімовай спартакіядзе работнікаў лясной гаспадаркі. Як і прадквазваў “МП” (гл. № 7 ад 25 студзеня), з перамогай са спаборніцтваў прыехала памочнік ляснічага Вараніноўскага даследча-вытворчага лясніцтва Дар’я Данілова. Яна была самай хуткай у індывідуальнай лыжнай гонцы. Жаночая каманда, у склад якой увайшла дзяўчына, таксама паказала лепшы вынік у каманднай эстафеце. “Срэбраным” прызёрам сярод “індывідуалаў”-мужчын стаў вадзіцель Хамічскага лясніцтва Уладзімір Данілоў – бацька пераможцы.

Агульная заслуга

Быхаўскі аддзел адукацыі, спорту і турызму райвыканкама заняў другое месца ў абласным смотры-конкурсе па лепшаму развіццю фізічнай культуры, спорту і турызму. Пры падліку балаў улічваліся самыя разнастайныя паказчыкі: ад агульнай колькасці спартыўных мерапрыемстваў і іх удзельнікаў, да развіцця інфраструктуры і прызавых месцаў на абласных і рэспубліканскіх спаборніцтвах.

Акцыя

Дзякуючы акцыям «Падары бібліятэцы кнігу» і «Стань духоўным мецэнатам» у 2016 году фонды бібліятэк раёна папоўніліся на 790 асобнікаў літаратуры. Акцыя «Падары бібліятэцы кнігу» працягваецца. Першым літаратурай падзяліўся быхаўчанін Аляксандр Квартальны, які прынёс у цэнтральную раённую бібліятэку імя Б.В.Стральцова 8 кніг.