У Быхаўскім раёне падведзены вынікі рэалізацыі праекту “Прыватна-дзяржаўнае партнёрства ў інтарэсах устойлівага развіцця сельскіх раёнаў Беларусі”. Яго сутнасць – прыцягненне карысных прыватных ідэй, якія змогуць удасканаліць агульна-грамадскае жыццё.

У працы семінару прынялі ўдзел дэпутат Палаты прадстаўнікоў Нацыянальнага сходу Рэспублікі Беларусь Таццяна Кананчук, дырэктар Міжнароднага фонду развіцця сельскіх тэрыторый Сяргей Тарасюк, намеснік старшыні камітэта эканомікі Магілёўскага аблвыканкама Вольга Яшына, а таксама прадстаўнікі Быхаўскага, Краснапольскага, Клічаўскага, Касцюковіцкага, Хоцімскага і Слаўгарадскага раёнаў.

У аграсядзібе “У Дудзіка” ішла размова аб вопыце і перспектывах дзейнасці цэнтраў рэгіянальнага развіцця пры мясцовых органах улады. Мадэратары падкрэслівалі, што ў кожным з раёнаў ёсць ініцыятыўныя людзі, якія зацікаўлены ў распрацоўцы розных незвычайных праектаў з мэтай прыцягнення грашовых сродкаў.

У Быхаўскім раёне на працягу бягучага года на конкурс было прадстаўлена 10 праектаў. Здаровы лад жыцця, рэсурсазахаванне, энергетычнае развіццё, гендарная роўнасць, сацыяльныя паслугі, захаванне культурнай і прыроднай спадчыны – спектр самы разнастайны.

У выніку прыцягнулі гранты пакуль толькі два праекты, распрацаваныя раённым цэнтрам сацыяльнага абслугоўвання насельніцтва. Так, праектам “Аніматар для сталых” зацікавіўся нямецкі фонд “Памяць, адказнасць і будучыня”, які выдзеліў быхаўчанам для яго рэалізацыі 5.410 еўра. Яшчэ адна міні-ініцыятыва “Выбар за табой” прыцягнула ў раён грант на амаль сем з паловай мільёнаў недэнамінаваных рублёў.

Удзельнікі семінару адзначылі, што арганізацыям і прадпрыемствам патрэбна праяўляць больш актыўнасці і ініцыятыў па ўдзелу ў новых праектах. Акрамя таго, не павінны заставацца ў баку і простыя грамадзяне. Прыцягненне грантаў пад крэатыўныя праекты – гэта рэальная магчымасць праявіць сябе і зрабіць карысную справу для грамадства. 

Наталля ЛЕВАЧКОВА.