Яе на прыёме старшыні Быхаўскага райвыканкама Сяргея Ігнаценкі расказалі адразу два наведвальнікі з Гадылёва. Іх аднапад’езднікі скардзяцца на свайго суседа, які пераўтварыў сваю кватэру амаль у сапраўдны сметнік.

Мужчыне за шэсцьдзясят. Некалькі гадоў таму ён пераехаў у пасёлак з абласнога цэнтра. Жыллё не яго – аднаго з сыноў, які дагэтуль у Магілёве і жыве. Ёсць яшчэ адзін сын. Той раней пражываў з бацькам: хуліганіў, моцна выпіваў, за што днямі быў накіраваны ў лячэбна-працоўны прафілакторый. Але, нават у параўнанні з выпівохай, пенсіянер выглядае куды больш “нязручным” суседам.

Па словах жыхароў з вуліцы Гасана, мужчына цягне дадому ўсё, што знойдзе ў смеццявых кантэйнерах. І калі з’яўленне тут шкляных бутэляк, паперы ды пластыкавай тары яшчэ як-небудзь растлумачваецца – здаць у другрэсурсы можна – дык іншы бруд разумнаму тлумачэнню не паддаецца. Здараецца, сучасны Плюшкін непасрэдна у пад’ездзе ладзіць імправізаваную сарціроўку “багацця”, а на ўсе заўвагі рэагуе лаянкай. Ну як з такім жыць побач? Прусакі, непрыемны пах, антысанітарыя…Падчас гаворкі з наведвальнікамі высветлілася, што за дапамогай яны ўжо звярталіся і да камунальных, і да праваахоўных службаў. Тыя складалі пратаколы, штрафавалі парушальніка, але больш паўплываць пакуль не здолелі – пенсіянер не ўладальнік кватэры, высяліць яго не могуць. Сын жа, якому і належыць нерухомасць у Гадылёва, амаль не з’яўляецца. Старшыня даручае адшукаць уладальніка па месцы яго жыхарства ў Магілёве. Тады пратаколы за неналежны санітарны стан жылля будуць афармляцца на яго. Тры такіх паперы – і справу можна перадаваць у суд. А там можа дайсці і да рашэння аб высяленні.

Яшчэ два звароты былі не такімі прыкметнымі, як гадылёўскі. Мужчына спрабаваў вырашыць пытанне аб працаўладкаванні: дзе б знайсці пасаду ахоўніка? Але такіх вакансій зараз няма, а прапанаваныя яго не задаволілі. Жыхарка ж Быхава ўжо сёмы год змагаецца з суседзямі за кавалачак зямлі. Паслухаўшы жанчыну, можна зразумець, што спрэчка разгарэлася з-за ўчастка шырынёй… у тры метры. Розных дакументаў за гэты час сабралося столькі… І амаль з усімі з іх пенсіянерка не згодная. Тым не менш, яе зноў выслухалі, растлумачылі парадак дзеянняў. Ён просты – зварот да судовых органаў.

Дарэчы:

Спіс тых, хто запісаўся на прыём да старшыні, быў значна больш вялікім. Шасцёра проста не прыйшлі, вырашыўшы свае пытанні на папярэднім этапе, альбо атрымаўшы дакладныя тлумачэнні.

Ягор ГАМАЮН.