Для вадзіцеляў грузавых аўтамабіляў аднымі з самых важных вытворчых паказчыкаў з’яўляюцца напрацаваныя тона-кіламетры, што азначае здабытак ад перамножанай колькасці перавезеных грузаў у тонах на адлегласць у кіламетрах. У большасці сельскіх працаўнікоў на колах, як правіла, першы множнік бывае даволі вялікі, бо даводзіцца перавозіць шмат грузаў унутрыгаспадарчага прызначэння на невялікія адлегласці, а вось для шафёра Сяргея Бінеўскага  з СВК “Абідавічы” расклад тут атрымліваецца трохі іншы.

—Ужо каторы год я спецыялізуюся на транспартыроўцы нашай прадукцыі самым розным спажыўцам як за межамі раёна, так і вобласці, а таксама дастаўцы грузаў адтуль у гаспадарку зваротным рэйсам, — распавядае Сяргей Уладзіміравіч. — Значную долю тут складае збожжа, якое важу на камбінаты хлебапрадуктаў у Магілёў, Бабруйск, Клімавічы, Оршу, іншыя гарады. Ад гэтых перапрацоўшчыкаў прывожу розныя віды камбікармоў, мінеральна-вітамінных дабавак, іншую прадукцыю.

Значную долю ў асартыменце перавозімых грузаў складаюць цэмент з Касцюковічаў, соль з Салігорску, заменнікі натуральнага малака з Магілёва ды іншае.

Пастаянна задзейнічаны на самых розных работах і ў гаспадарцы, асабліва падчас правядзення адказных сельскагаспадарчых кампаній.

Для таго, каб плённа ды без лішніх здарэнняў рознага кшталту працаваць на дальнабойных маршрутах, неабходна трымаць тэхніку ў спраўным стане. Майму аўтамабілю МАЗ-555102 ужо каля дзесяці год, але да гэтага часу абыходзілася без сур’ёзных паломак і рамонтаў. Трэба своечасова рабіць тэхнічнае абслугоўванне, прафілактыку, чым пастаянна ўласнаручна займаюся.

Сяргею Бінеўскаму не пазычаць стараннасці ды адказнасці ў працы, а таксама вадзіцельскага стажу, бо таго за плячыма — цэлых 37 гадоў. Яшчэ ў далёкія 1970-80-я гады працаваў у тагачасным калгасе “18-ы партз’езд” на савецкіх “газонах” ды “зілах”. Усе гэтыя гады ён дабіваўся высокіх вынікаў у працы, часта станавіўся пераможцам у працоўным спаборніцтве.

Па выніках 2014 года з паказчыкам аб’ёма выкананай работы ў 312 715 тона-кіламетраў Сяргей Бінеўскі стаў адным з лепшых вадзіцеляў раёна.

Мікола Ахрыменя.