Галоўнага агранома СВК “Новабыхаўскі” Васіля Цікавенку ў канторы праўлення бачаць рэдка. На веласіпедзе ён бывае ўсюды, дзе працуюць хлебаробы. Але бліжэй да абедзенага перапынку, калі работніца бухгалтэрыі патэлефанавала яму па “сотавіку”, то неўзабаве прыехаў. Тут і адбылася наша размова, з самага пачатку якой пацікавіўся вынікамі жніва.

—    Жніво мы завяршылі паспяхова, сказаў Васіль Леанідавіч, хаця збожжавыя культуры займалі 1644 гектары. Да таго ж у зерневую групу перавялі 110 гектараў зернебабовых, якія па спеласці падыходзілі да ўборкі на зерне. Іх таксама ўбралі не ва ўрон тэмпам і якасці ўборачнай кампаніі. А пачыналі яе з азімага рапсу, які займаў 430 гектараў. І ён парадаваў. З кожнага гектара выйшла ў сярэднім па 20,5 цэнтнера. Агульны ж валавы збор зерня склаў 4800 тон — на 800 тон болей, чым летась пры сярэдняй ураджайнасці ў 30 цэнтнераў з гектара.

—    Але ж гэта некалькі ніжэй сярэднераённага паказчыка, ці не так?

—    Гэта сапраўды так, хаця ў цэлым яравыя збожжавыя далі з гектара па 35 цэнтнераў зерня, што вышэй, чым у сярэднім па раёну. А вось з-за таго, што азімая пшаніца на тутэйшых палетках неўрадзіла і яе сабралі з гектара ў сярэднім па 17 цэнтнераў, то знізілася і агульная ўраджайнасць. Пшанічны ж палетак быў даволі ладны, 215 гектараў. Таму мы болей тут сеяць гэтую культуру не будзем, а паспрабуем пасеяць яе ў Тайманаўскім вытворчым участку, дзе бал зямлі лепшы. Таму ў наступным годзе і будзем рабіць канчатковы вывад. Збяром добры ўраджай — прымем станоўчае рашэнне, не збяром — болей сеяць не будзем.
Убіралі збажыну 8 камбайнаў, працавалі зладжана. Экіпажамі-тысячнікамі сталі Аляксандр Баранаў з сынам Яўгенам, Аляксандр Храмцоў з Уладзімірам Ярашэнкам.

Ёсць таксама тысячнікі на адвозцы зерня. Імі сталі вадзіцелі МАЗаў Аляксандр Пракапенка і Мікалай Кузьмічоў.
На фінішы жніва пяць камбайнаў прыйшлі да нас на дапамогу з ААТ “ПМК-85 Водбуд”.

—    На збожжатаку спраўляліся перапрацоўваць прывозімае ад камбайнаў зерне?

—    А як жа. У нас маюцца два збожжатакі. Цэнтральным загадвае Леанід Цярэшчанка, а Тайманаўскім — Ірына Казюлька. Ім добра дапамагалі школьнікі. Таму гаспадарка паспяхова справілася з дзяржаўным заказам па зерню, выканаем такі заказ і па грачысе, якой трэба рэалізаваць 45 тон.

—    Якія работы зараз выконваеце на восеньскім полі?

—    Самыя розныя. Каб не забыцца, адразу скажу, што пасля таго, як мы ўбралі 60 працэнтаў жніўных палеткаў, выдзелілі тры камбайны на ўласныя соткі. Якраз стаяла неблагое надвор’е і мы добра ўправіліся. Людзі засталіся задаволенымі. А што датычыцца палеткаў гаспадаркі, то на іх заканчваем звозіць салому. Пасеялі ўжо 440 гектараў азімага рапсу, 50 — азімай сурэпкі. Распачынаем сяўбу азімых — пшаніцы, трэцікале і жыта, якія зоймуць 1012 гектараў. На энерганасычаным трактары МТЗ-3022 у агрэгаце з сеялкаю АКПМ-6 сее азіміну вопытны хлебароб Віктар Кручкоў. Ён шчыруе пакуль адзін. Механізатары Васіль Віхроў і Павел Казюлька займаюцца ворывам, дыскаваннем глебы пад сяўбу. Але неўзабаве нехта з іх падключыцца непасрэдна да сяўбы, падчапіўшы другую сеялку АКПН-6, каб поўнасцю адсеяцца да 20 верасня ў лепшыя агратэхнічныя тэрміны.
Працягваем нарыхтоўку кармоў. Кукурузаю заняты 880 гектараў. Пакуль яе ўбірае толькі на падкормку жывёле механізатар Міхаіл Казлоў, а ягоны калега і цёзка Міхаіл Сілкоў рыхтуе да работы другі такі агрэгат КЗР-10, каб выйсці на масавую ўборку каралевы палёў, пачаць закладваць сілас.

20 гектараў займаюць карняплоды. Урадзілі добра. Сярэдняя ўраджайнасць іх павінна скласці цэнтнераў 800 з гектара.

Ёсць 50 гектараў бульбы. Ужо скасілі бацвінне і днямі пачнём выкопваць клубні. Так што сёлета мы будзем не толькі з добрым запасам зерня, а і кармоў. А калі ўсё гэта ёсць, то будуць добрымі падчас зімоўкі грамадскага пагалоўя надоі і прывагі.

Гутарыў Мікола КОЛАСАЎ.