Выдатны беларускі мовазнавец і журналіст, доктар філалагічных навук Міхаіл Яўгенавіч Цікоцкі — чалавек рускі па паходжанні, але беларус — па духу.

Аднойчы ўдакладніла ў прафесара: вашы карані ў Пецярбургу? Ён адказаў досыць рэзка: «Гэта няважна! Хоць карані мае сапраўды расійскія, душой я беларус. І словам — беларус!» Невыпадкова ўсё жыццё ён вывучае сугучнасць слоў жывых сваёй РОДНАЙ беларускай мовы.

Ён нарадзіўся ў сям’і Яўгена Карлавіча Цікоцкага — вядомага кампазітара, народнага артыста СССР, аднаго з заснавальнікаў прафесійнай музычнай творчасці ў Беларусі. Па бацькавым шляху не пайшоў, бо з дзяцінства была велізарная цікавасць да слова, яшчэ хлапчуком пісаў вершы і нават паэмы.

Ён скончыў школу ў 1941 годзе, на 22 чэрвеня быў прызначаны выпускны баль. Але… свой «чорны баль» распачала вайна. Два гады — у акупацыі. У 1943-м удалося звязацца з партызанамі: Любанскі раён, востраў Зыслаў. Потым на самалёце сям’ю вядомага кампазітара Цікоцкага пераправілі ў Маскву. Адтуль пайшоў на фронт. Ваяваў на 1-м, 2-м і 3-м Беларускіх франтах. Дайшоў да Кёнігсберга. Быў паранены… Сярод шматлікіх узнагарод самыя дарагія — два медалі «За адвагу». Узнагароды гэтыя даваліся толькі за баявыя дзеянні…

Пасля вайны паступіў на аддзяленне журналістыкі Белдзяржуніверсітэта. Вучыўся і паралельна працаваў у газеце «Савецкі селянін», потым у «Калгаснай праўдзе», супрацоўнічаў з «Вожыкам».

Міхаіл Цікоцкі — у ліку заснавальнікаў школы беларускай стылістыкі, аўтар прац па вывучэнні мовы нашых класікаў — Я. Коласа, Я. Купалы, К. Чорнага, М. Лужаніна, У. Караткевіча, І. Мележа… Грунтоўна займаўся стылістыкай публіцыстычных жанраў.

Больш як паўвека прафесар Міхаіл Цікоцкі выкладаў на факультэце журналістыкі БДУ. Не адно пакаленне журналістаў з удзячнасцю ўспамінае яго ўнікальныя моўныя ўрокі.

Міхаіл Яўгенавіч Цікоцкі ўзнагароджаны знакам «Заслужаны работнік Беларускага дзяржаўнага ўніверсітэта». Днямі гэтую ганаровую ўзнагароду прафесару ўручылі дырэктар Інстытута журналістыкі БДУ Сяргей Дубовік і загадчык кафедры стылістыкі і літаратурнага рэдагавання Віктар Іўчанкаў.

23 лютага ў Інстытуце журналістыкі пройдзе Міжнародная навукова-практычная канферэнцыя «Жыццём і словам прысягаючы…», прысвечаная 90-годдзю доктара філалагічных навук, прафесара, заслужанага работніка адукацыі Рэспублікі Беларусь Міхаіла Яўгенавіча Цікоцкага.

Таццяна Падаляк, Звязда