Бульбяны палетак у СВК “Абідавічы” зойме сёлета 180 гектараў

За гады, на працягу якіх СВК “Абідавічы” спецыялізуецца на вырошчванні элітных і харчовых гатункаў бульбы, склалася звяно вопытных бульбаводаў. У яго ўваходзіць перадавы механізатар гаспадаркі Аляксандр Чарняцоў, з якім нядаўна мы сустрэліся на палетку каля вёскі Трасціўка.

—Халодная вясна трохі зацягнула тэрміны пасадкі бульбы, але пры такім спрыяльным надвор’і, як цяпер, мы хутка ўправімся з работамі, — расказвае Аляксандр Уладзіміравіч. — Своечасова ды якасна падрыхтоўвае для майго камбайна палеткі, наразаючы барозны, калега Генадзь Андросенка, яшчэ адзін таварыш — Міхаіл Селіванаў — спецыяльным агрэгатам пасля пасадкі бульбы робіць на палетку грабяні пэўнай формы, каб потым было лепей апрацоўваць пасевы.

Сёлета бульба добра захавалася ў сховішчы, у тым ліку і насенная, што дае падставы для добрага ўраджаю. Далей усё будзе залежыць ад умоў надвор’я, а таксама ад зладжанасці ў працы бульбаводчага звяна на ўсіх этапах вырошчвання гэтай каштоўнай культуры.

З пачатку кампаніі па стану на 29 красавіка Аляксандр Чарняцоў на сваім трактары МТЗ-82 з камбайнам СК-4 пасадзіў клубні на плошчы 94 гектары. Увесь бульбяны палетак у СВК “Абідавічы” зойме сёлета 180 гектараў.

Мікалай Ахрыменя.