Вытворчае жыццё сельгаспрадпрыемстваў гэтымі вясновымі часінамі віруе на палетках. Тут вырашаецца лёс будучага ўраджаю яравых культур, які ў шмат чым наўпрост залежыць ад самаадданай працы земляробаў.

Чарговым разам давялося ў гэтым упэўніцца, наведаўшыся ў СВК “Абідавічы” і сустрэўшыся з тэхнолагамі земляробчай галіны і механізатарамі. Шмат клопатаў цяпер у галоўнага агранома гаспадаркі Дзяніса Мельнікава, які меней года таму закончыў Жыліцкі дзяржаўны сельскагаспадарчы каледж і прыехаў сюды па размеркаванню.

—Завіхацца цяпер сапраўды даводзіцца зранку да вечара, — расказвае Дзяніс Міхайлавіч. — Толькі ўсё гэта нармальна і зразумела, бо, як кажуць, веснавы дзень год корміць. Вось толькі, да прыкладу, крыўдна за нашыя мінулагоднія восеньскія намаганнні і выдаткі па азімаму рапсу, пасевы якога не перажылі зіму амаль на чатырох пятых плошчаў. Давядзецца іх перасяваць яравым рапсам, а гэта будзе звязана з вялікімі расходамі фінансавых ды матэрыяльных сродкаў. Добра, што азімыя збожжавыя культуры нядрэнна перазімавалі і паказваюць віды на неблагі ўраджай.

У гэтым нас пераканала ізумрудная шчотка пасеваў азімых, якую ўбачылі паблізу вёскі Старое Сяло, калі ехалі са спецыялістам на палетак за населеным пунктам. Там на трактары МТЗ-3022 з пасяўным комплексам АКПМ-6 на пасеве ячменю шчыраваў вопытны механізатар СВК Сяргей Падапрыгара. У Сяргея Аляксандравіча гэта ўжо далёка ні першая пасяўная кампанія, таму ён добра ведае кошт любой вясновай хвіліны і працуе ад сёмай гадзіны раніцы да позняга вечара. На рахунку перадавога хлебароба ўжо маецца 370 гектараў засеяных плошчаў пад яравыя збожжавыя культуры.

Унушальнай лічбы ў амаль 2 тысячы гектараў плошчаў падкормленных пашаў, азімых збожжавых, палеткаў з унесеннымі мінеральнымі ўгнаеннямі сёлета ўжо дасягнуў на трактары МТЗ-82      з раскідвальнікам МТТ-4 вопытны механізатар СВК “Абідавічы” Іван Жукаў. У гэтым жа Чырвонаслабодскім вытворчым участку гаспадаркі плённа працуе механізатар са стажам Мікалай Аляксеенка, якому кіраўніцтва нядаўна даверыла новы трактар МТЗ-1025, падключыўшы яго да ўзорвання глебы пад веснавую сяўбу.

Старшыня прафкама гаспадаркі Зінаіда Ганчарова адзначыла добрыя паказчыкі на вясенне-палявых работах механізатараў Васіля Кавалені, Васіля Ганчарова, Дзмітрыя Лялькова, Міхаіла Берыбулава ды іншых. Поспехі перадавікоў на пасеве яравых, узорванні глебы, культывацыі палеткаў, унясенні мінеральных угнаенняў штодзённа адлюстроўваюцца на экране працоўнага спаборніцтва, што вывешваецца на мехдвары СВК.

Акрамя ідэалагічнага забеспячэння пасяўной, добра наладжана і яе харчовае абслугоўванне. Яго належна арганізавалі майстры сваёй справы – загадчыца сталоўкай Ірына Трахімовіч, кухары Вераніка Ткачова і Алена Пішчаленка.

Мікалай Ахрыменя.