Быхаўскі кулямётчык Васіль Пятровіч Крыўцоў
Партызан 61-га партызанскага атрада, які дзейнічаў у Бялыніцкім, Клічаўскім, Магілёўскім, Шклоўскім, Быхаўскім і Кіраўскім раёнах Магілёўскай вобласці. Нарадзіўся ў 1918 годзе ў вёсцы Палом Клічаўскага раёна. У партызанах з мая 1942 года.
7 жніўня 1942 года група байцоў атрада (15 чалавек) пад камандаваннем лейтэнанта Я.Ф. Каўшырка выйшла на заданне ў раёне вёскі Кучын Быхаўскага раёна. Разграміўшы валасную нямецкую ўправу, група па дарозе назад спынілася ў невялічкім лесе. У гэты час гітлераўцы праводзілі карныя экспедыцыі. Па даносе правакатара фашысты даведаліся пра месцазнаходжанне партызанаў.
Раніцай 9 жніўня калона немцаў колькасцю да 1500 чалавек акружыла з усіх бакоў Кучынскі лес і шчыльным ланцугом пачала яго прачэсваць. Камандзір падраздзялення прыняў рашэнне змагацца да канца. Калі карнікі падышлі зусім блізка, партызаны сустрэлі іх ружэйна-кулямётным агнём. Праціўнік вымушаны быў адступіць, а затым зноў перайшоў да атакі. Партызаны вытрымалі і яе.
Асабліва ў гэтым баі вызначыўся кулямётчык Васіль Крыўцоў. Ад яго меткага агню засталіся на полі бою дзясяткі варожых салдат. Фашысты вымушаны былі выкарыстаць супраць адважных партызанаў мінамёты. Пасля абстрэлу партызанскай пазіцыі зноў перайшлі ў атаку. Няроўны бой доўжыўся больш як дзве гадзіны. Адзін за адным гінулі мужныя героі, неўзабаве змоўк і кулямёт Васіля Крыўцова… З пятнаццаці байцоў групы толькі двум удалося выратавацца. Праціўнік страціў 78 чалавек забітымі і больш за сотню параненымі.
23 жніўня 1944 года камандаванне атрада аформіла ўзнагародны ліст на прадстаўленне Васіля Крыўцова да звання Героя Савецкага Саюза. 28 жніўня ўзнагародны ліст падпісаў і камандзір Магілёўскай ваенна-аператыўнай групы К.М. Белавусаў. Толькі Указам Прэзідыума Вярхоўнага Савета СССР ад 30 снежня 1948 г. Васіль Крыўцоў пасмяротна ўзнагароджаны ордэнам Айчыннай вайны І-й ступені.