Звычайна кажуць, што мінёры памыляюцца ў жыцці ўсяго адзін раз, а сіноптыкі ледзве не кожны дзень. І ў гэтым ёсць пэўная доля праўды. Толькі цяпер прагнозы гідраметэаралагічнай службы былі дакладнымі.

Пасля адносна халодных і слотных дзён ужо ў суботу засвяціла сонца ды прыгрэла настолькі, што ртутны слупок узняўся да 21-градуснай адзнакі. І першы пагодлівы дзень адразу скарысталі земляробы вышэй названай гаспадаркі, выехалі ў поле. У нядзелю ж яны працавалі на палетках у самых розных месцах.

На так званае кузькавіцкае поле прыехалі на трактарах МТЗ-1221 і МТЗ-3022 Уладзімір Фот з сынам Аляксеем (на здымку), каб узараць яго абаротнымі плугамі пад пшаніцу. Тут на ўсёй 65-гектарнай плошчы напярэдадні ўнеслі калійныя, фосфарныя ўгнаенні, азотныя ж рассеюць па ўзаранай глебе перад самай сяўбой.

За вёскаю Малая Смаліца, па левы бок дарогі, на трактары МТЗ-1221 з чызельным культыватарам КЧ-51 шчыраваў Міхаіл Краўцоў, якога і сфатаграфаваў (на здымку) падчас кароткага перапынку, калі той вырашыў спыніцца, паглядзець на якасць сваёй работы, хаця тут толькі пабывала галоўны аграном сельгаспрадпрыемства Інэса Поклад.

—    Гэты палетак у 40 гектараў адзін з найбольш складаных, — кажа трактарыст. — Летась з-за вялікай гразкасці мы выехалі на яго толькі ў канцы красавіка, а сёлета зямля падсохла літаральна на вачах. Яна пераўвільготнена толькі перад хмызняком каля дарогі, ды і тое трактар пераадольвае тую мясціну без прабуксоўкі.

Пасля абеду тут будзе працаваць на МТЗ-1221 з чызелем Віктар Вербічаў.

Па другі бок дарогі, на ўзгорку, бачым энерганасычаны МТЗ-3022 у агрэгаце з сеялкаю АКПМ-6, за якою цягнецца… шлейф пылу. Магутны трактар са спаранымі заднімі коламі для павелічэння прахадзімасці на нізкіх месцах рухаецца да дарогі, якая вядзе на Ветранку. Там ужо чакаюць старшыня праўлення гаспадаркі Анатоль Тумакоў і яго намеснік па сельгасвытворчасці Мікалай Дваракоў. Мікалай Фёдаравіч знаходзіцца тут пастаянна, кантралюе якасць сяўбы, унясенне мінеральных тукаў перад ёю, а старшыня толькі пад’ехаў.

Каля дарогі стаіць аўтазагрузчык зерня Сяргея Кускова. Пасля таго, як ён засыпаў у бункер пасяўнога агрэгата амаль 2 тоны насення ячменю і механізатар Мікалай Іваноў пакінуў кабіну трактара, абодва кіраўнікі павялі з імі гамонку аб сельскагаспадарчых справах (на здымку), а праз некалькі хвілін пасяўная тэхніка зноў уключылася ў работу.

Затое пад’ехаў на МТЗ-1221 з раскідвальнікам мінеральных угнаенняў Віктар Цубатаў (на здымку).

Акрамя яго на гэтым палетку ўносіць у глебу вітаміны ўрадлівасці перад сяўбою Віктар Макаранка, які нядаўна паехаў у Быхаў за ўгнаеннямі.

Пасяўны агрэгат, дарэчы, будзе скарыстоўвацца ў дзве змены. Мікалая Іванова падменіць Сяргей Кускоў.

Вопытны, дбайны гаспадарнік АнатольТумакоў распавядае, што палявыя работы вядуцца ў комплексе і ўсюды.

За аграгарадком Смаліца на 100-гектарным полі грузіць арганіку на “Амкадоры” Аляксандр Баброў, а раскідваюць яе механізатары Аляксандр Васількоў, Валерый Якімаў і Валерый Кулажын. Тут плануецца пасеяць кукурузу на зерне. І яшчэ 50 гектараў у іншым месцы.

Усяго ж раннія каласавыя зоймуць 1250 гектараў, 289 гектараў — зернебабовыя культуры, 200  — бульба, 12 — гародніна, 540 гектараў — зноў кукуруза, але ўжо на корм жывёле. Але іх, акрамя каласавых, пасеюць пазней.

Мікола КОЛАСАЎ.