У Быхаве развітваліся з Масленіцай шырокай
У мінулую нядзелю на Кастрычніцкай плошчы горада адбылося любімае народам свята “Бывай, Масленіца шырокая”. У ягоную праграму ўваходзілі рознага кшталту фальклорныя, культурна-забаўляльныя мерапрыемствы, работа гульнявых пляцовак, гандаль, кірмаш сельскагаспадарчай прадукцыі ды іншае.
Галоўнае дзейства праходзіла на ўпрыгожанай у вясенніх атрыбутах ды колерах сцэне, дзе работнікі раённага цэнтра культуры ладзілі тэатралізаванае прадстаўленне. Яно было прысвечана менавіта нагляднаму паказу гледачам сутнасці свята Масленіцы шырокай. Яго карані ідуць з глыбокай старажытнасці, калі нашы продкі праважалі зіму, з радасцю і надзеяй чакалі блізкай вясны, чарговага абнаўлення прыроды.
Абавязковым атрыбутам Масленіцы з’яўляліся блінцы, якія мелі рытуальнае значэнне: круглыя, румяныя, гарачыя, яны ўяўлялі сабою сімвал сонца, якое свяціла ўсё ярчэй, грэла зямлю, падоўжвала светавы дзень.
З прыходам на Русь хрысціянства Масленіца працягвала жыць, стаўшы апошнім вялікім святам перад наступленнем сямітыднёвага вялікоднага посту.
Артысты таксама паказалі на сцэне адметнасць кожнага дня масленічнага тыдня, у які ладзіліся пэўныя абрады. Панядзелак — гэта час сустрэчы Масленіцы, аўторак — дзень жартаў. Серадою-ласухаю цешчы запрашалі зяцёў на блінцы, а ў шырокі чацвер ладзіліся зімовыя гульні. У пятніцу ўжо зяці звалі цешчаў на пачастункі, субота адводзілася на розныя пасядзелкі, а сёмы дзень — нядзеля — называўся днём даравання, калі людзі даравалі адно адному свае сапраўдныя ці ўяўныя дрэнныя ўчынкі.
А яшчэ ў апошні дзень Масленіцы спальвалі пудзіла Зімы, якое звычайна ўбіралі ў жаночую вопратку. Гэтак зрабілі пад шумныя воклікі гледачоў і ўдзельнікі тэатралізаванага дзейства на Кастрычніцкай плошчы, запаліўшы абрадавы касцёр пасяродку яе.
У кастра на Масленіцу, як лічыцца, ёсць яшчэ адно вельмі важнае таямнічае прызначанне — ён ачышчае ад усяго дрэннага ды злога, што назбіралася ў чалавека за доўгую цёмную зіму і падрыхтоўвае яго да добрага ды светлага ўвесну. Таму можна лічыць, што такі абрад тым днём прайшлі колькі сотняў сабраўшыхся на плошчы быхаўчан і гасцей горада.
Арганізатары свята падрыхтавалі таксама шмат іншых мерапрыемстваў на розны густ. Дарослыя і дзеці змаглі скарыстацца паслугамі гульнявых і конкурсных пляцовак, лялечнага тэатра “Батлейка”, пунктаў пракату веласіпедаў, міні-матацыклаў, што арганізавалі для іх установы культуры і адукацыі горада, гандлёвых радоў хлебазавода, раённага спажывецкага таварыства, аб’яднання грамадскага харчавання.
Там прадаваліся тавары, гатовіліся шашлыкі, але ўсё гэта рабілася, трэба асобна адзначыць, яўна, ў недастатковай колькасці і не надта аператыўна, бо перад прылаўкамі выстройваліся даўжэнныя чэргі, што не вельмі падвышала настрой грамадзян.
Сельскагаспадарчы кірмаш таксама ўвачавідку не ўдаўся, бо гандлявалі на плошчы толькі СВК “Валадарскі” і “Следзюкі”. Работнікам апошняга, дарэчы, многія ўдзельнікі свята выказвалі вялікую ўдзячнасць, бо тыя прапанавалі пакупнікам мясную прадукцыю неблагой якасці, розныя апетытныя харчовыя вырабы, кшталту шашлыкоў, фаршыраванай рыбы, вэнджаных рабрынак ды гэтак далей.
Забаўлялі ўдзельнікаў свята сваімі песеннымі нумарамі артысты народнага калектыву “Дняпроўскія зоры”, шматлікія самадзейныя вакалісты.
Мікалай Ахрыменя.