Прэзентацыя новай кнігі Міколы Леўчанкі «Вяртанне» (фото)
У ДУА “Гімназія г.Быхава” супрацоўнікі цэнтральнай раённай бібліятэкі правялі прэзентацыю новай кнігі мясцовага пісьменніка Міколы Леўчанкі “Вяртанне”. Гэта кніга-споведзь, у якую ўвайшлі вершы пра малую Радзіму, успаміны пра дзяцінства, край маленства, блізкіх і дарагіх сэрцу аўтара людзей, гумарэскі, літаратурна-крытычныя артыкулы пра творчасць пісьменнікаў Магілёўшчыны.
Вядучая Аксана Дрозд пазнаёміла прысутных з жыццёвым шляхам і асаблівасцямі творчасці пісьменніка. Сам аўтар расказаў аб жыццёвых момантах, якія натхняюць яго на стварэнне твораў рознага жанру, чытаў свае вершы.
На мерапрыемстве прысутнічаў сакратар арганізацыі КПБ, сябар пісьменніка М.Казлоў, які выказаў свае ўраджанні аб творчасці Мікалая Уладзіміравіча, з задавальненнем прачытаў верш са зборніка, які быў прысвечаны менавіта яму. На вечары гучалі вершы з новага выдання ў выкананні вучняў школ горада. Прыхільніца таленту М.Леўчанкі Г.Казюлька прачытала гумарэску “Флікер”. Дырэктар Быхаўскай бібліятэчнай сеткі Н.Корза з пажаданнямі здароўя і новых творчых дасягненняў падзяквала Мікалая Уладзіміравіча за задавальненне, якое прыносіць чытанне яго кніг, зачытала верш з новай кнігі, які аўтар прысвяціў ёй, як цудоўнай жанчыне.
Да мерапрыемства была аформлена выстава кніг М.Леўчанкі “Як многа сілы ў кожным слове”, дэманстравалася слайд-прэзентацыя “За ўсё свайму ўдзячны лёсу”.
