Незабыўная сустрэча
Мала хто ведае, што ў далёкім 1971 годзе пісьменнік Іван Шамякін наведваў Быхаў, бо прыязджаў ён на сустрэчу са сваімі чытачамі. Былы дырэктар СШ №1 Валянціна Драчова і да сённяшняга часу беражліва захоўвае падпісаную ім кнігу “Лёс майго земляка”.
– Мы з калегамі вельмі чакалі тады Івана Пятровіча, – успамінае Валянціна Рыгораўна. – Перад прыездам пісьменніка ўсе купілі яго кнігу, каб атрымаць аўтограф. І вось 10 лістапада ў райкаме партыі сабралася поўная зала людзей. Мы з захапленнем глядзелі на вядомага не толькі ў Беларусі, а і ў СССР аўтара.
Ён расказаў аб сваім франтавым і мірным жыцці, аб тым, як працаваў над сваімі творамі і што мяркуе напісаць у бліжэйшыя гады. Задуманае ён потым ажыццявіў.
Творчасць Івана Шамякіна атрымала ўсенароднае прызнанне і любоў як у нашай рэспубліцы, так і за яе межамі. Яго раманы, аповесці і апавяданні перакладзены на многія мовы свету.
Па шмат якіх творах народнага пісьменніка Беларусі створаны мастацкія фільмы. Экраніраваны аповесці “Шлюбная ноч”, “Гандлярка і паэт”, раманы “Глыбокая плынь”, “Атланты і карыятыды”, “Вазьму твой боль”.
Па кінааповесці “Эшалон у Германію” зняты фільм “Хлеб пахне порахам”.
Кацярына СВІРЫДЗЕНКА.