Пад кіраўніцтвам першага намесніка міністра інфармацыі Рэспублікі Беларусь Ліліі Ананіч адбылася рабочая нарада па падрыхтоўцы Дня беларускага пісьменства ў Быхаве.

Яна адзначыла, што Міністэрства інфармацыі краіны з’яўляецца галоўным каардынатарам па арганізацыі падрыхтоўчых мерапрыемстваў, асабліва творчай часткі праграмы, вялікага рэспубліканскага свята, чаму і будзе ў асноўным прысвечаны парадак дня гэтай нарады. Яшчэ адной

асаблівасцю з’яўляецца тое, што ў ёй бяруць удзел прадстаўнікі тых гарадоў краіны, дзе да гэтага праходзілі Дні беларускага пісьменства, каб вызначыцца па правядзенню ў рамках 20-га, юбілейнага свята своеасаблівага фестывалю ягоных сталіц.

Вітаючы дэлегацыі гарадоў-сталіц Дня беларускага пісьменства, іншых удзельнікаў нарады, старшыня Быхаўскага раённага выканаўчага камітэта Дзмітрый Калееў выказаў шчырае спадзяванне на плённае супрацоўніцтва з усімі зацікаўленнымі службамі розных узроўняў з мэтай якаснай падрыхтоўкі і зладжанага правядзення вялікага мерапрыемства.

Што тычыцца матэрыяльнага боку арганізацыі будучага свята, зазначыў Дзмітрый Міхайлавіч, то ўдзельнікі нарады змаглі ўжо ўбачыць ці яшчэ па ходу паездкі па Быхаву пабачаць маштабы разгорнутых будаўнічых і рамонтных работ, і папрасіў іх потым падзяліцца сваімі ўражаннямі і прапановамі.

Пры абмеркаванні пытанняў парадку дня нарады асноўную ўвагу Лілія Ананіч удзяліла менавіта арганізацыі фестывалю гарадоў-сталіц. Дарэчы, гэтым разам у Быхаў прыехалі іхнія прадстаўнікі з Полацка, Жыткавіч, Турава, Навагрудка, Мсціслава, Карэліч, Камянца, Шклова, Барысава, Смаргоні, Хойнікаў, Ганцавіч. У свяце таксама будуць удзельнічаць дэлегацыі з Нясвіжа, Пінска, Заслаўя, Оршы і Пастаў.

Першым чынам дэлегацыі, кіраўнікі служб, арганізатары свята абмяняліся кантактнымі тэлефонамі, каб далей аператыўна і прадметна супрацоўнічаць. Затым пайшла напрацоўка першых варыянтаў гэтай значнай і важнай часткі праграмы свята. Тут свае прапановы па праекту фестывалю ўнесла галоўны рэжысёр Дня беларускага пісьменства Ніна Осіпава, сэнс якіх заключаўся ў тым, каб прэзентацыі гарадоў вызначаліся адметнасцю ды, разам з тым, распазнавальнасцю.

Адбылася зацікаўленная прадметная дыскусія з удзелам спецыялістаў адпаведных служб, прадстаўнікоў дэлегацый сталіц.

Начальнік галоўнага ўпраўлення ідэалагічнай работы, культуры і па справах моладзі аблвыканкама Анатоль Сінкавец азнаёміў удзельнікаў нарады з асноўнай праграмай маючага адбыцца Дня беларускага пісьменства. Пачнецца ён 31 жніўня 2013 года адкрыццём шэрагу аб’ектаў сацыяльнай інфраструктуры горада, малых сцэнічных пляцовак, працягнецца службамі ў храмах, хросным ходам, вячэрнім канцэртам зорак эстрады і іншымі мерапрыемствамі. 1 верасня адбудуцца асноўныя мерапрыемствы, у тым ліку ўрачыстае адкрыццё свята ў 12 гадзін дня на галоўнай сцэнічнай пляцоўцы на гарадскім стадыёне, дзе будзе разгорнуты партэр на дзве з паловаю тысячы месцаў для гледачоў, адкрыццё скульптурнай кампазіцыі, шмат чаго іншага, а таксама галоўны вячэрні канцэрт, урачыстае закрыццё Дня, святочны фейерверк.

Лілія Ананіч папрасіла кіраўніцтва Быхаўскага раёна, адпаведныя службы асабліва вызначыцца па сустрэчах шматлікіх гасцей рэспубліканскага свята, у тым ліку замежных, а таксама груп дыпламатаў, пісьменнікаў, журналістаў і г. д. Абмяркоўваліся таксама пытанні тэхнічнага забеспячэння правядзення складанага маштабнага мерапрыемства.

Далей удзельнікі нарады наведалі некалькі рэканструіруемых аб’ектаў горада, у тым ліку гарадскі стадыён, дзе на месцы вызначыліся па некаторых асноўных момантах правядзення Дня беларускага пісьменства.

Мікалай Іваноў.