У Мінскім выдавецтве “Чатыры чвэрці” выйшла ў свет новая кніга галоўнага рэдактара Быхаўскай раённай газеты “Маяк Прыдняпроўя”, члена Саюза пісьменнікаў Беларусі Міколы Леўчанкі “Вяртанне”, прадмову да якой пад назваю “Летапісец Быхаўскага краю” напісаў старшыня Мінскага гарадскога аддзялення Саюза пісьменнікаў Беларусі, член Праўлення Саюза пісьменнікаў Саюзнай дзяржавы Міхась Пазнякоў.

У аснове кнігі — цыкл вершаў, які стаў яе назваю, паколькі аўтар апісвае паездку з Быхава на сваю малую радзіму ў Касцюковіцкі раён, у пасёлак для перасяленцаў пасля катастрофы на ЧАЭС Шарэйкі.  Такіх вершаў, прасякнутых любоўю да свайго Прыдняпроўскага краю, 35 і апошнім значыцца верш “Вёска”, які прысвечаны сваёй роднай вёсцы Калодзецкай, у якой нарадзіўся і вырас, але якой ужо даўно няма на гэтым свеце.

Ёсць у кнізе шэраг іншых вершаваных твораў, а таксама раздзел даволі цікавых гумарэсак, сюжэт якіх узяты з рэальнага жыцця, раздзел літаратурна-крытычных артыкулаў і ўспамінаў.
У літаратурна-крытычных артыкулах паказана творчасць паэтаў і празаікаў Магілёўшчыны: Аляксея Пысіна, Алеся Пісьмянкова, Васіля Ткачова, Міхася Кавалёва (Слівы), Міколы Макарцова, Міколы Падабеда, іншых вядомых літаратараў.

Гэтае насычанае выданне дапаўняе раздзел “Фоташтрыхі біяграфіі”, у якім змешчаны чорна-белыя і каляровыя фотаздымкі розных гадоў жыцця аўтара, пачынаючы з юнац-тва і па сённяшні дзень.
Кніга, а яна складае 249 старонак, зацікавіць усіх, хто любіць свой родны край, цікавіцца яго гісторыяй, лёсамі вядомых творчых людзей Быхаўшчыны і Магілёўшчыны. Яна будзе карыснай для настаўнікаў і вучняў старэйшых класаў, студэнтаў. А купіць яе можна ў кніжным аддзеле магазіна “Тавары для дома”, які знаходзіцца з правага боку каля ўваходу на базар у горадзе Быхаве.
Дарэчы, тут таксама можна яшчэ набыць кнігу Міколы Леўчанкі “Крылатая гвардия”, прысвечаную 57-ай марской ракетаноснай авіяцыйнай дывізіі, якая некалі дыслакавалася ў нашым горадзе. Гэта ўжо апошнія яе экземпляры.

Калі хто купіць тую ці іншую кнігу журналіста і пісьменніка Міколы Леўчанкі, захоча займець ягоны аўтограф, то, калі ласка, прыходзьце ў рэдакцыю, і вы яго атрымаеце.

Сяргей АНДРЭЕЎ.