На пашыранай нарадзе ў старшыні райвыканкама Дзмітрыя Калеева, апроч начальнікаў аддзелаў і ўпраўленняў выканкама, кіраўнікоў раённых службаў прысутнічалі таксама старшыні праўленняў сельскагаспадарчых вытворчых кааператываў і сельвыканкмаў.

Дзелавая гамонка вялася аб забеспячэнні належнага правапарадку на вуліцах горада, аб стварэнні гарадской аглядавай камісіі, якая будзе кантраляваць стан супрацьпажарнай бяспекі жылля грамадзян, працягу маніторынгу аб’ектаў гандлю на прадмет выяўлення там пратэрмінаваных прадуктаў харчавання і так далей, аб чым інфармавалі начальнік аддзела ўнутраных спраў райвыканкама Аляксандр Андрэйчыкаў, намеснік начальніка раённага аддзела па надзвычайных сітуацыях Дзмітрый Краснапёраў, галоўны санітарны ўрач раёна Мікалай Мацвееў, некаторыя іншыя пасадавыя асабы.

Востра паўстала пытанне аб узнікненні так званых несанкцыяваных звалак усцяж дарог, напрыклад, дарогі на вёску Ямнае, у прылягаючых да горада пералесках. Неаднаразавыя папярэджванні аб тым, што смецце, цвёрдыя бытавыя адыходы неабходна вывозіць толькі на палігон ЖКГ ужо не дзейнічаюць на парушальнікаў. Яны па-ранейшаму паводзяць сябе нахабна. Таму, запатрабаваў Калееў, да іх трэба прымяняць максімальныя штрафныя санкцыі.

Звалкі смецця ўтвараюцца і вакол могілак, якіх у раёне 141, бо людзі пачалі рыхтавацца да Радаўніцы . Значыць, варта неадкладна каля кожнага кладзішча вызначыць канкрэтнае месца, куды людзі могуць зносіць смецце, ачышчаючы магілы продкаў. Камунгас потым яго забярэ і завязе, куды трэба.
Па-ранейшаму не знімаюцца з парадку дня непрыгодных для жылля хат, якія трэба зносіць. У Баркалабаўскім сельсавеце іх 74, у Смаліцкім — 72, у Чарнаборскім — 76, Ямніцкім — 54 і т. д. Набіраецца больш 500 такіх хацін, якія, дарэчы, ёсць яшчэ і ў горадзе. Таму Дзмітрый Калееў невыпадкова сказаў, што на яго думку гэтыя лічбы нават некалькі заніжаныя. Іх варта яшчэ раз удакладніць, знесці тоя, што псуе выгляд населеных пунктаў.

Варта і надалей працягваць паўсюдна наводзіць парадак. Да гэтай важнай справы абавязкова трэба прыцягнуць насельніцтва. Можа тады нават несвядомыя людзі зразумеюць, што парадак лягчэй падтрымліваць, чым наводзіць.

Мікола ВАЛОДЗІН.