Паспяховае звяно

Каб работнік на якой-небудзь вытворчасці, у галіне сацыяльнай сферы ці ў творчай дзейнасці дасягнуў пэўных поспехаў, патрэбна спалучэнне шматлікіх абставін і акалічнасцяў як суб’ектыўнага, так і аб’ектыўнага характару. Першае вызначаецца ў асноўным працоўнымі якасцямі асобы, другое — умовамі, што створаны для рэалізацыі здольнасцяў работніка, уключаючы меры матэрыяльнага і маральнага заахвочвання.

Першыя ж хвіліны маёй размовы з аператарам па вырошчванню цялят малочна-таварнай фермы “Залатва-1” СК “Дуброва” Наталляй Лаўрэнавай (на здымку) паказалі, што такога кшталту плённае ўзаемадзеянне асабістага і вытворчага якраз і мае месца ў дадзеным выпадку. Яна з ахвотаю і нават гонарам расказвала пра сваю працу, асаблівасці падыходаў да тэхналогіі вырошчвання маладняку буйной рагатай жывёлы, адносіны кіраўніцтва фермы і сельгаспрадпрыемства да жывёлаводаў і ацэнкі іхняй працы.

—Трэба адразу ўлічыць тое, — звяртае маю ўвагу Наталля Валер’еўна, — што вырошчваем мы цялят у памяшканнях пабудовы, пэўна, 50-гадавой даўніны, дзе цяжка ў поўнай меры скарыстаць перавагі механізацыі, а даводзіцца нямала працаваць і ўручную. Гэта, мабыць, самы значны пакуль недахоп у арганізацыі працы цялятніц, які з правядзеннем далейшай рэканструкцыі фермы, як гэта ўжо адбылося на ўчастку малочнай вытворчасці, будзе, спадзяёмся, ліквідаваны.

У астатнім належныя ўмовы для высокапрадукцыйнай працы створаны. Гэта тычыцца, у першую чаргу, забеспячэння пагалоўя цялят кармамі. Спецыфікі тут шмат, бо забіраем мы цялят на вырошчванне з 20-дзённага ўзросту, якіх кормім да двух месяцаў цэльным малаком. Потым ужо ў рацыён уключаюцца спачатку замяняльнікі цэльнага малака, далей — спецыяльныя прамысловыя канцэнтраты, камбікармы ўласнай вытворчасці, сена, сянаж. Абавязковымі і важнымі момантамі догляду за цялятамі з’яўляюцца трохразавае іх паенне цёплаю вадою і пастаяннае падсціланне месцаў утрымання сухою саломаю.
Усю тэхналогію вырошчвання маладняку стараюся выконваць у поўным аб’ёме і ў неабходныя тэрміны, чым, лічу, і дабіваюся пэўных пазітыўных вынікаў у працы.

А што яны добрыя, калі ні сказаць лепей, пацвердзіла лічбамі загадчыца фермы Соф’я Радзіёнава, якая ўдзельнічала ў размове. Па выніках мінулага года аператар па вырошчванню цялят Наталля Лаўрэнава атрымала сярэднясутачную прывагу ў 891 грам пры стапрацэнтнай захаванасці маладняку. Спачатку гэтага года прывага складае каля 1300 грамаў.

Важным вынікам высокапрадукцыйнай працы перадавой цялятніцы з’яўляецца тое, што маладыя цялушачкі 6-месячнага ўзросту пастаўляюцца на далейшае дарошчванне на ферму ў вёску Галееўка ў добрым фізіялагічным стане і належных вагавых кандыцыях. Гэта, у сваю чаргу, становіцца пэўным гарантам атрымання на выхадзе паўнавартаснай прадукцыйнай цялушкі, якая  зноўку ж увядзецца ў дойны статак Залатвянскай фермы, каб даваць прадукцыю — малако і цялят. Так замыкаецца тэхналагічны ланцужок, дзе важнае кожнае звяно.

Паказчыкі працы Наталлі Лаўрэнавай сталіся лепшымі сярод аператараў па вырошчванню цялят раёна па выніках работы за 2012 год і яна будзе дэлегатам сённяшняга злёту перадавікоў народнай гаспадаркі Быхаўшчыны.

Мікалай Ахрыменя