Пахаладае да мінус 32
Спецыяліст Рэспубліканскага гідраметцэнтра Мінпрыроды Вольга Фядотава паведаміла, што ў сераду і чацвер Беларусь застанецца на ўскрайку антыцыклону, а разам з тым з боку ўсходу кантынента да нас завітае чарговая порцыя вельмі халоднага кантынентальнага паветра. Маразы яшчэ ўзмоцняцца. Месцамі па краіне прагназуецца невялікі снег. Дарогі месцамі слізкія. Холад распаўсюдзіцца па ўсёй тэрыторыі Беларусі. Уначы 2 лютага тэмпература паветра 22—27 марозу, пры праясненнях ажно да мінус 28—32 градусаў ніжэй за нуль. Удзень чакаецца мінус 15—22 градусы, у асобных раёнах да 23—25 марозу. Сіноптыкі падлічылі, што такі тэмпературны фон на 12—17 градусаў ніжэйшы за кліматычную норму.
Паводле папярэдніх прагнозаў, захаваюцца моцныя маразы і напрыканцы тыдня. Пры гэтым у выхадныя вільготнае паветра прынясе ў заходнія раёны краіны кароткачасовы снег, месцамі з завірухай. Тэмпература паветра ў ноч на суботу чакаецца мінус 15—22, пры праясненнях да 23—28 марозу, у ноч на нядзелю — мінус 13—20, на ўсходзе краіны да 23—29 градусаў ніжэй за нуль. Удзень на выхадныя прагназуецца мінус 10—17, месцамі да 20 марозу. Зіма лютуе…