У Няражскім малочна-таварным комплексе СВК “Валадарскі” працягваюцца мадэрнізацыя матэрыяльна-тэхнічнай базы і ўдасканаленне тэхналагічных працэсаў
У Няражскім малочна-таварным комплексе СВК “Валадарскі” працягваюцца мадэрнізацыя матэрыяльна-тэхнічнай базы і ўдасканаленне тэхналагічных працэсаў. Пры гэтым, асаблівую ўвагу кіраўніцтва і спецыялісты надаюць узнаўленню малочнага статку, як асновы развіцця галіны.
Таму за апошні час на МТК ажыццявілі шэраг новаўвядзенняў па догляду за маладняком буйной рагатай жывёлы, у прыватнасці, за цялушачкамі. Ужо выкарыстоўваецца сучасны метад іх вырошчвання пры так званым халодным ўтрыманні ў спецыяльных боксах, размешчаных па-за жывёлагадоўчымі памяшканнямі. Корміцца маладняк цэльным малаком пры дапамозе спецыяльных паільных вядзёр, а ў боксе падсцілаецца салома.
Па сучасных тэхналогіях наладжаны догляд за вялікай групай цялят, якія ўтрымліваюцца ў нядаўна рэканструяваным памяшканні. Там выпойванне іх заменнікам малака робіцца праз аўтаматычную ўстаноўку, так званую ў простамоўі электрамаму, што працуе на аснове камп’ютарнай праграмы згодна з індывідуальным кодам для кожнай жывёліны.
Мікалай Ахрыменя.