У чатырох дзесятых і трох адзіннаццатых класах абласнога ліцэя №5 у г. Быхаве будзе вучыцца 105 вучняў. Большасць іх — жыхары нашага райцэнтра і сельскіх населеных пунктаў, але ёсць і моладзь з Кіраўскага і Слаўгарадскага раёнаў.
Для ўсіх іх 1-га верасня празвінеў першы званок падчас урачыстай лінейкі, удзел у якой узялі старшыня раённага выканаўчага камітэта Мікалай Кароцін і начальнік упраўлення аховы здароўя аблвыканкама Уладзімір Шрубаў. У віншавальным слове з нагоды Дня ведаў Мікалай Мікалаевіч адзначыў, што для маладога пакалення вельмі важным з’яўляецца імкненне да пазнання новага, авалодвання жыццёвымі навыкамі. Ліцэй якраз і з’яўляецца тым плацдармам, праз які можна дасягнуць шмат чаго з гэтага, падрыхтаваць сябе належным чынам да атрымання прафесіі.
Быхаўшчына цяпер стабільна развіваецца па ўсіх накірунках эканамічнага, сацыяльнага і культурнага жыцця і ёй вельмі патрэбны новыя маладыя кадры для далейшага прагрэсу.  Кіраўнік раёна выказаў надзею, што шмат хто з прысутных ліцэістаў пасля заканчэння гэтай установы, а затым — атрымання вышэйшай ці сярэдняй спецыяльнай адукацыі, абавязкова вернецца на сваю малую радзіму.
Сказаў добрыя словы ліцэістам на дарогу ў новы навучальны год, а таксама ў далейшае самастойнае жыццё Уладзімір Шрубаў (на здымку).
Павіншаваў прысутных са святам старшыня раённай арганізацыі “Беларускі саюз афіцэраў”, палкоўнік у адстаўцы Аляксандр Баранаў, які папрасіў і надалей шанаваць традыцыі, памяць аб былой слаўнай 57-й ракетаноснай авіяцыйнай дывізіі.
Пра вынікі дзейнасці ўстановы за мінулы навучальны год, планах на цяперашні ў свеце патрабаванняў кіраўніцтва краіны гаварыў у сваім выступленні дырэктар ліцэя Віктар Радзькоў. Ён выказаў надзею, што ліцэй стане сапраўднаю школаю жыцця для ўсіх ягоных выхаванцаў.

Мікалай Ахрыменя.

***

а ўрачыстую лінейку з нагоды Дня ведаў у Дунайкоўскі ВПК прыйшлі не толькі ўсе вучні, настаўнікі, а і многія бацькі школьнікаў. Выпускнікоў сёлета будзе сем чалавек, а першакласнікаў толькі двое.
Дырэктар вучэбна-педагагічнага комплексу Пётр Пастаялка пасля віншавання прысутных з пачаткам новага навучальнага года ўручыў будучым выпускнікам кнігі “Я — грамадзянін Рэспублікі Беларусь”, а іх маленькім пераемнікам — кнігі ад Прэзідэнта нашай краіны Аляксандра Лукашэнкі “Мая Радзіма — Беларусь”.
З Днём ведаў выпуснікоў віталі старшыня Дунайкоўскага сельвыканкама Кацярына Свірыдзенка, якая ўручыла дзвюм лепшым вучаніцам сувеніры. Дырэктар ДЛГУ “Быхаўскі лясгас” і дэпутат раённага Савета па гэтай выбарчай акрузе Віктар Кузняцоў, які прыехаў на свята са сваім намеснікам па ідэялагічнай рабоце Анатолем Кірэявым. Віктар Барысавіч затым падараваў школе два валейбольныя і два футбольныя мячы.
Галоўны рэдактар раённай газеты “Маяк Прыдняпроўя”, член Саюза пісьменнікаў Беларусі Мікола Леўчанка пасля слоў віншавання нагадаў прысутным, што 4 верасня краіна будзе адзначаць Дзень беларускага пісьменства, які пройдзе ў Ганцавічах на Берасцейшчыне. Разбежка ў часе паміж Днём ведаў і Днём беларускага пісьменства зусім невялікая. І гэта невыпадкова паколькі пісьменнаць грунтуецца на ведах, на іх пазнанні з азоў. Калі чалавек не ўмее пісаць, чытаць, то аб пісьменнасці не можа быць ніякай гамонкі. А пісаць, чытаць нас вучаць у школе.
Пасля ўрачыстай лінейкі вучні са сваімі настаўнікамі разышліся па класах.

Ул. Інф.