Сярэдні ўзровень інтэлекту дзяцей, бацькі якіх захапляюцца алкагольнымі напоямі, ніжэй, чым у тых, хто нараджаецца ў бацькоў непітушчых. Дарэчы, размова ідзе не толькі пра алкаголь моцнаградусны, але і пра такі “высакародны”, як віно. Нездарма яшчэ шмат гадоў таму ў краінах, дзе віно п’юць нібы сок, з’явіўся тэрмін “вінаградныя дзеці”. Нарадзіўся, зразумела, не таму, што немаўлят “знайшлі” ў вінаградніку… Як паведамляюць беларускія нарколагі, звесткі, якія збіраліся ў Савецкім Саюзе да 1965 года, сведчаць аб тым, што рост колькасці дзяцей з прыроджанымі парокамі знаходзіўся ў цеснай сувязі з ростам колькасці ўжытага насельніцтвам алкаголю.

— Неверагоднае глупства гаварыць аб тым, што для ратавання нацыі нам сёння неабходна пераключацца з ужывання моцнаградуснай на слабаалкагольную прадукцыю, скажам, віно або піва, — кажа кіраўнік Цэнтра маніторынгу наркасітуацыі Рэспубліканскага навукова-практычнага цэнтра псіхічнага здароўя, кандыдат медыцынскіх навук Сяргей ОСІПЧЫК. — Так званы “міжземнаморскі” тып ужывання алкагольных напояў абсалютна не гарантуе адсутнасці шкоды, якую апошнія наносяць здароўю чалавека любога ўзросту і любой нацыянальнасці. Вядомы шэраг развітых краін, дзе празмернае захапленне півам і віном прывяло да з’яўлення вялікай колькасці “піўных” або “вінных” алкаголікаў.

Алкаголь, у аснове якога, як мы ведаем, этылавы спірт — гэта растваральнік арганічнага паходжання, а значыць, ён заўсёды прыводзіць да таксічнага атручэння, у большай ці меншай ступені. Такім чынам, важна не тое, наколькі высакародныя напоі будзе ўжываць нацыя, а тое, каб агульнае ўжыванне ў папуляцыі зніжалася. Толькі так мы зможам знізіць і колькасць шкодных наступстваў, якія звязаны з ужываннем алкаголю.

Немагчыма дасягнуць таго, каб у такой краіне, як наша, наогул забыліся на алкаголь. Не назіраецца гэтага, скажам, і ў Швецыі, дзе дастаткова вялікая колькасць насельніцтва пакутуе ад алкагольнай залежнасці. Аднак у гэтай краіне не гінуць у дарожна-транспартных здарэннях з прычыны п’янства. Гэта праява эфектыўнасці адпаведных дзяржаўных мер… Нам жа пакуль не ўдаецца вырашыць нават пытанне зацікаўленасці хворага на алкагалізм у поспеху лячэння. Кожны трэці алкаголік ухіляецца ад лячэння любымі спосабамі.

Святлана БАРЫСЕНКА, ” Звязда”