На базе ДЛГУ “Быхаўскі лясгас” прайшоў раённы Дзень аховы працы
Пытанні бяспечных умоў працы, захавання здароўя работнікаў, зніжэння вытворчага траўматызму сталі асноўнымі падчас нядаўняга правядзення на базе ДЛГУ “Быхаўскі лясгас” раённага Дня аховы працы з удзелам дырэктара названай лесагаспадарчай установы Віктара Кузняцова, спецыялістаў па ахове працы прадпрыемстваў і арганізацый Быхаўшчыны, намесніка старшыні райвыканкама Віктара Агнетава.
Віктар Агнетаў, адкрываючы мерапрыемства, адзначыў, што рэалізацыя правоў работнікаў на бяспечныя ўмовы працы з’яўляецца адной з важнейшых задач сацыяльнай палітыкі дзяржавы, бо ў арганізацыях усіх формаў уласнасці не заўсёды праводзіцца эфектыўная работа, накіраваная на прадухіленне вытворчага траўматызму і захворванняў, а таксама на ахову і ўмацаванне здароўя работнікаў. У сёлетнім 2018 годзе на тэрыторыі раёна зарэгістравана 5 няшчасных выпадкаў на вытворчасці і яшчэ адзін — са смяротным зыходам.
Па словах дырэктара ДЛГУ “Быхаўскі лясгас” Віктара Кузняцова, ва ўзначальваемай ім арганізацыі таксама адбыўся няшчасны выпадак на нарыхтоўцы лесу, на шчасце, работнік застаўся жыць.
Лесагаспадарчая ўстанова сёлета выдаткавала больш за 50 тысяч рублёў на сродкі індывідуальнай абароны работнікаў. У лясніцтвах раёна арганізавалі 86 праверак і выявілі 256 парушэнняў заканадаўства аб ахове працы. Да дысцып-лінарнай адказнасці прыцягнулі 31 чалавека. Асаблівая ўвага надаецца таксама пажарнай бяспецы.
На думку галоўнага дзяржаўнага інспектара працы аддзела нагляду за выкананнем заканадаўства аб ахове працы Магілёўскага абласнога ўпраўлення Дэпартамента дзяржаўнай інспекцыі працы Юліі Мітранковай, асобныя спецыялісты па ахове працы не ў поўнай меры выконваюць абавязкі, прадугледжаныя тыпавым Палажэннем аб службе аховы працы арганізацыі.
На Быхаўшчыне найбольш характэрнымі парушэннямі аховы працы з’яўляюцца такія, як допуск работнікаў да выканання работ з павышанай небяспекай без інструктажу, стажыраванняі і правядзення праверкі ведаў па пытаннях аховы працы.
Варта адзначыць, што некаторым наймальнікам пытанні заканадаўства аб працы і аб ахове працы не абыякавыя.У трэцім квартале гэтага года ў Магілёўскае абласное ўпраўленне Дэпартамента дзяржаўнай інспекцыі працы з просьбай аб правядзенні абследавання выканання заканадаўства аб ахове працы звярнуліся ТАА “Быхаўлес”, філіял ДРБУ № 196 КУП “Магілёўаблдарбуд”, ДУА “Яслі-сад Вясёлка г. Быхава”. Ім была аказана патрэбная дапамога.
Дзяржаўнымі інспектарамі ў арганізацыях раёна праведзена 11 абследаванняў выканання заканадаўства аб ахове працы, выяўлена і прадпісана да ўхілення 130 парушэнняў. Праведзена таксама 6 кантрольных мерапрыемстваў па выкананні патрабаванняў раней выдадзеных прадпісанняў.
Інжынер па ахове працы філіяла «Макранскі» ААТ «Быхаўскі КАСЗ» Юлія Голачава распавяла гамонку аб арганізацыі работы па ахове працы непасрэдна ў іхнім філіяле.
Лекар прафпаталогіі Быхаўскай ЦРБ Ілля Цікавенка інфармаваў аб парадку правядзення абавязковых медыцынскіх аглядаў работнікаў, якія працуюць на вытворчасці.
Старшыня раённага аб’яднання Чырвонага Крыжу Людміла Ждан правяла практычнае навучанне па аказанні першай медыцынскай дапамогі пацярпелым.
Карыснае мерапрыемства завяршылася наведваннем яго ўдзельнікамі рамонтна-механічнай майстэрні ДЛГУ «Быхаўскі лясгас”, дзе ў суправаджэнні інжынера-механіка лесагаспадарчай установы Сяргея Кандрацьева агледзелі адміністрацыйны будынак, шынамантажнае аддзяленне з абмеркаваннем належнага абсталявання працоўных месцаў, а таксама захаванне працаўнікамі патрабаванняў аховы працы падчас работы з механізмамі.
Сяргей ЛЕЎЧАНКА.