За бяспечную працу

З 4 верасня па 3 кастрычніка ў арганізацыях жыллёва-камунальнай гаспадаркі праходзіць раённы месячнік бяспечнай працы. Яго мэта – засяроджанне ўвагі на забеспячэнні безумоўнага і няўхільнага выканання норм і правілаў аховы працы, недапушчэнне вытворчага траўматызму.

Сацыяльная абарона

355 шматдзетныя сем’і раёна атрымалі аднаразовую матэрыяльную дапамогу для падрыхтоўкі дзяцей школьнага ўзросту да новага навучальнага года. Сума выплат склала 41736 рублёў. Падтрымка аказана ў адпаведнасці з Дзяржаўнай праграмай «Здароўе народа і дэмаграфічная бяспека Рэспублікі Беларусь».  Дадатковую дапамогу сваім работнікам адрасавалі і 26 арганізацый раёна. На 359 сем’яў прыйшлося 27385 рублёў.

Крымінал

4,1 кг высушанай макавай саломкі выяўлена і канфіскавана супрацоўнікамі міліцыі ў дачным доме ў в. Сапяжынка. Па гэтым факце Быхаўскім раённым аддзелам СК распачата крымінальная справа ў дачыненні да двух непрацуючых быхаўчан.

Мульцяшны флэшмоб

У суботу на пляцоўцы каля фізкультурна-аздараўленчага цэнтра прайшло тэатралізавана-гульнявое прадстаўленне «Мультык-Пультык і яго сябры ў краіне творчасці». Усе жадаючыя маглі не толькі пазнаёміцца з аб’яднаннямі па інтарэсах раённага цэнтра дзіцячай творчасці, а і запісацца ў іх. Рабяты гулялі з казачнымі персанажамі, удзельнічалі ў майстар-класах, танцавальным флэшмобе.

Віншуем!

Пераможцам рэспубліканскага конкурсу «Нацыянальная літаратурная прэмія» 2016 года ў намінацыі «Лепшы твор для дзяцей і юнацтва» стаў наш зямляк, пісьменнік Міхаіл Пазнякоў з кнігай «Возера Дзіва». Дыпломы і сімвал прэміі ўручаны аўтару на Дні беларускага пісьменства ў Полацку.