Навіны Быхаўшчыны адным абзацам
Крадзёж з ахоўнага домаўладання прадухілілі супрацоўнікі Быхаўскага аддзялення Дэпартамента аховы. Раней судзімы, нідзе не працуючы быхаўчанін хацеў пажывіцца за чужы кошт, пакуль гаспадары адсутнічалі, аднак яго спудзіла спрацаваўшая сігналізацыя. Ужо праз некалькі хвілін група затрымання прыбыла на месца. З дапамогай службовай аўчаркі міліцыянеры затрымалі зламысніка.
Незвычайная бібліятэка
Гарадская перасоўная бібліятэка сямейнага чытання пераўтварылася ў… гульнятэку. Назву носіць досыць гучную: «Арт-тэрыторыя». Дзеці праяўляюць тут свае творчыя фантазіі – малююць, лепяць, робяць вырабы, гуляюць у настольныя гульні. Аформлены тут і цікавыя кніжныя выставы. На «Востраве кніжных скарбаў», напрыклад, сабраны творы аб знакамітых падарожніках, пошуках скарбаў і неверагодных прыгодах. Адважныя героі, абардаж і чорны сцяг – уся гэтая атмасфера пануе ў кнігах аб піратах, якія любяць не толькі юнакі, але і многія дарослыя.
Быхаўскія майстры
Майстры-метадысты Быхаўскага цэнтра культуры, народнай творчасці і рамёстваў Ірына Фадзеева і Алена Новікава пабылі на “Дрыбінскіх таржках” – фестывалі аматараў народнай творчасці, які адбыўся ўжо ў сёмы раз. У гэтым годзе ў форуме прынялі ўдзел творчыя калектывы і майстры Магілёўскай, Гомельскай, Віцебскай, Мінскай абласцей, а таксама госці с Расіі і Украіны. Нашы землякі годна прэзентавалі свае творчыя магчымасці. Наведвальнікі іх талент ацанілі.