У Гарадзецкім лясніцтве, якое ўзначальвае вопытны, ініцыятыўны ляснічы Сяргей Каваленка, падначаленыя ніколі не сядзяць без справы. Кожны, а ўсяго разам з ляснічым у штатным раскладзе значыцца 29 чалавек, ведае, што яму трэба рабіць не толькі сёння, а і заўтра, у перспектыве. Больш таго, за ўсім, што робіцца на тэрыторыі, наладжаны пастаянны кантроль. Тут усё робіцца зыходзячы з дзяржаўных інтарэсаў, таму калектыў і ходзіць у лідарах спаборніцтва сярод лясніцтваў дзяржаўнай лесагаспадарчай установы “Быхаўскі лясгас”. Ён даволі паспяхова выканаў даведзеную вытворчую праграму першага квартала сёлетняга года, плённа папрацаваў у першым месяцы другога квартала. У красавіку на 37 гектарах пасадзілі саджанцы лясных культур, пры заданні 500 кубаметраў нарыхтавалі 1400 кубаметраў агульнай драўніны. Тут з самага лепшага боку вызначыліся брыгада Віктара Мазура, лесарубы Дзмітрый Вайцянкоў, Яўген Лысуха. За тры тыдні названая брыгада нарыхтавала 600 кубаметраў драўніны.
Паколькі ў красавіку збіраецца бярозавы сок, то ляснічы ўзяў на працу часова шэсць чалавек, якія сабралі 92 тоны бярозавіка. Гэта другі паказчык у лясгасе. Болей гарадзецкіх сабралі бярозавага соку толькі дунайкоўскія зборшчыкі.
Зараз наладжаны догляд за ляснымі культурамі, вядзецца распрацоўка пашкоджаных насаджэнняў, ачыстка прыдарожных лесапалосаў. Тут шчыруюць ляснікі Мікалай Сіпакоў, Сяргей Бондараў.
Для дастаўкі людзей да месца работы ў лесе кіраўніцтва лясгаса выдзеліла лясніцтву новы аўтамабіль УАЗ “Фермер”, за што гарадзецкія лесаводы асабліва ўдзячны.
Ёсць у лясным масіве непадалёку ад вёскі Рэзкі помнік загінуўшаму падчас Вялікай Айчыннай вайны партызану Мікалаю Гросу, які натрапіў на засаду фашыстаў. Ужо праз колькі год пасля Вялікай Перамогі над гітлераўскай Германіяй сюды прыязджалі з легендарнага горада Севастопаля два браты партызана. Сустрэчу з імі добра памятае тагачасны старшыня Гарадзецкага сельвыканкама Надзея Нароўская, аб чым і паведаміла. Цяпер сюды ніхто не прыязджае, бо няма каму, але гэта зусім не азначае, што магіла партызана забытая. Яе даглядае лясніцтва. Да Дня Перамогі тут належным чынам усё прыбралі, пафарбавалі металічную агароджу, усклалі цюльпаны. Зробленую добрую справу паказаў ляснічы Сяргей Каваленка (на здымку), які свята шануе памяць загінуўшых герояў той страшнай вайны.
Працоўная вахта лесаводаў працягваецца. Яны рупна робяць тое, што ім даручаецца, робяць хутка, якасна. Таму і сярэднемесячны заробак у іх вышэй, чым у сярэднім па лясгасу.
Мікола ВАЛОДЗІН.