УЛАДАЛЬНІКАМ ЗБРОІ

Жадаючым працягнуць тэрмін дзеяння дазволу на захоўванне і нашэнне грамадзянскай зброі неабходна будзе прадастаўляць медыцынскую даведку аб стане здароўя. Дадзеная норма ўступае ў сілу з 26 красавіка і ўведзена з мэтай своечасовага анулявання дазволаў і канфіскацыі зброі ў людзей з пэўнымі захворваннямі і фізічнымі недахопамі, якія з’яўляюцца супрацьпаказаннем да яго валодання. Дарэчы, за парушэнне тэрміну перарэгістрацыі агнястрэльнай ці газавай зброі прадугледжаны штраф да 15 базавых велічынь.

СЛЕДЧЫ КАМІТЭТ

12 красавіка на базе Быхаўскага РАСК адбылася абласная выязная аператыўная нарада з удзелам начальніка ўпраўлення Следчага камітэта Республікі Беларусь па Магілёўскай вобласці Андрэя Ліса па пытаннях, што тычацца дзейнасці камітэта. Пасля заканчэння мерапрыемства яго ўдзельнікі пазнаёміліся з памятнымі мясцінамі Быхаўшчыны, у тым ліку мемарыялам каля вёскі Лудчыцы, а таксама наведалі Баркалабаўскі манастыр.

ТАЛЕНАВІТЫЯ ПІЯНІСТКІ

Выхаванкі дзіцячай школы мастацтваў г. Быхава перамаглі ў абласным конкурсе юных піяністаў, які прайшоў у дзяржаўным музычным каледжы імя М.А. Рымскага-Корсакава.Творчыя спаборніцтвы праходзілі ў 4 групах сярод дзяцей ад 6 да 15 гадоў, у кожнай з якіх было заяўлена больш за 50 удзельнікаў. Быхаўчанкі пакарылі прафесійнае журы выразнасцю, музычнасцю, складанасцю выкананых праграм і атрымалі высокія ўзнагароды: Соф’я Пазнякова – Дыплом лаўрэата II ступені ў малодшай узроставай групе. Анастасія Бухрашвілі – Дыплом I ступені. Соф’я Мотуз – Дыплом III ступені ў сярэдняй узроставай групе. Дар’я Саўчанка – Дыплом лаўрэата II ступені ў старэйшай узроставай групе.

ПАСПЯХОВЫ ДЭБЮТ

Падведзены вынікі абласнога конкурсу фотаработ “Зямля, дзе пашчасціла нарадзіцца», які праводзіўся ў рамках акцыі “Збяры Беларусь у сваім сэрцы». Трэцяе месца ў намінацыі «Рэдкі кадр» заняла навучэнка Абідавіцкага ВПК Ганна Ткачэнка са здымкам «Мой сябар — бусел». 

КАРЫСНЫЯ ЭКСКУРСІІ

У рамках прафарыентацыйнай работы навучэнцы школ Быхаўшчыны распачалі масавыя экскурсіі на прадпрыемствы і ў арганізацыі раёна. Яны знаёмяцца са спецыфікай працы, калектывамі, даведваюцца аб установах, дзе можна атрымаць тую ці іншую спецыяльнасць. Так, навучэнцы сярэдняй школы №2 ужо наведалі ААТ «Быхаўскі кансервава-агароднінасушыльны завод», раённы аддзел па надзвычайных сітуацыях, Быхаўскую раённую ветэрынарную станцыю, бібліятэку, аўта- і чыгуначную стан-цыю, аўташколу.