Ганаровае званне

Указам Прэзідэнта Рэспублікі Беларусь Аляксандра Лукашэнкі Ганаровага звання “Заслужаны работнік сацыяльнай абароны Рэспублікі Беларусь” удастоена дырэктар дзяржаўнай установы сацыяльнага абслугоўвання “Быхаўскі псіханеўралагічны дом-інтэрнат” Зінаіда Пракаповіч. Віншуем з высокім дасягненнем!

Таленавітыя вынаходнікі

Быхаўчане прынялі ўдзел у абласным этапе конкурсу навукова-тэхнічнай творчасці праекта Саюзнай дзяржавы «Таленты XXI стагоддзя». Навучэнец 9 класа гімназіі г. Быхава Мікалай Касцюкоў пад кіраўніцтвам настаўніка біялогіі Анастасіі Адамчанкі распрацаваў праект пад назвай «Экагорад Эрыда — горад маёй будучыні». Адзінаццацікласнік УА «Магілёўскі дзяржаўны абласны ліцэй №5» (г. Быхаў) Сцяпан Каржоў і выкладчык інфарматыкі і матэматыкі Андрэй Бельскі прадставілі мультымедыйную онлайн-экскурсію па музеі 57-ай МРАД.

Акцыя

Рэспубліканская акцыя «За бяспеку разам» распачалася на гэтым тыдні. Да 28 красавіка супрацоўнікі раённага аддзела па надзвычайных сітуацыях наведаюць адзінокіх і адзінока пражываючых састарэлых грамадзян, інвалідаў, а таксама сем’і, у якіх дзеці знаходзяцца ў сацыяльна-небяспечным становішчы, і дадуць рэкамендацыі па павышэнні ўзроўню пажарнай бяспекі жылля.

Вольны час

Літаратурная гульня «Вялікі сябар дзяцінства Карней Чукоўскі» да 135-годдзя пісьменніка праведзена ў Грудзінаўскай сельскай бібліятэцы-музеі. Хлопчыкі і дзяўчынкі актыўна ўдзельнічалі ў гульне-віктарыне і вясёлых конкурсах паводле яго твораў, з цікавасцю прагледзелі электронную прэзентацыю «Беражыце кнігу!». Потым частаваліся салодкімі прысмакамі.