Латарэя, віктарыны, песні

У перыяд школьных зімовых канікул цікавыя і займальныя мерапрыемствы для хлопчыкаў і дзяўчынак падрыхтавалі работнікі бібліятэк. У ДУА «Вараніноўскі ВПК д/сад-БШ» адбылася конкурсна-гульнявая праграма «Новы год – сюрпрызаў час», дзе іх забаўлялі не толькі галоўныя навагоднія персанажы Дзед Мароз і Снягурка, але і героі з дзіцячых казак. Займальна прайшла і навагодняя латарэя. Таксама дзецям распавялі пра навінкі літаратуры. А ў школьным лагеры СШ №2 бібліятэкары правялі гульнявую праграму «У зімовых варот навагодні карагод». Для дзяцей былі арганізаваны віктарыны, жарты, песні.

На дапамогу

У мінулую суботу ў аддзяленне ДАІ АУС райвыканкама трапіла паведамленне, што зблізку вёскі Хачынка кіроўца мікрааўтобуса з’ехаў у кювет. Механічных пашкоджанняў не атрымаў, аднак самастойна выбрацца не змог. Яму на дапамогу быў накіраваны спецыялізаваны транспарт ДЭУ-76. Дзякуючы аператыўным дзеянням, кіроўца працягнуў свой шлях.

Мультымедыйная гадзіна

Бібліятэкары гарадской бібліятэкі-філіяла №49 мікрараёна Быхаў-1 запрасілі сваіх юных чытачоў прыняць удзел у мультымедыйнай гадзіне «Як сустракаюць Новы год людзі ўсіх зямных шырот» і, каб мерапрыемства запомнілася, зрабілі яго вясёлым, напоўненым цудамі, гульнямі, конкурсамі. Віртуальнае вандраванне па краінах свету дазволіла дзецям даведацца аб разнастайнасці навагодніх традыцый і звычаяў.

Своечасовае выратаванне

Супрацоўнікі Быхаўскага аддзялення Дэпартамента аховы ў мінулыя выхадныя дні літаральна выратавалі ад замярзання дваіх жыхароў райцэнтра. У першым выпадку міліцыянеры дапамаглі завесці аўтамабіль, які заглух, і гора-кіроўца змог даехаць да месца назначэння. А неўзабаве іх дапамога спатрэбілася замярзаючаму чалавеку, дарэчы, інваліду, якога на службовай машыне адвезлі дадому.

Узнагароды за творчасць

Новымі ўзнагародамі папоўнілася капілка дасягненняў Быхаўскай дзіцячай школы мастацтваў. У III адкрытым фестывалі-конкурсе юных піяністаў “Натхненне”, які прайшоў у Клічаўскім раёне, Анастасія Бухрашвілі стала пераможцай і атрымала дыплом I ступені, а Цімафей Сідарэнка адзначаны дыпломам удзельніка. Сярод вучняў дзіцячых школ мастацтваў Магілёўскай вобласці, прыняўшых удзел у фестывале-свяце вакальна-харавой творчасці “Дняпроўскія званочкі”, годна выступіла маленькая таленавітая быхаўчанка Кацярына Малахава, за што і была ўзнагароджана дыпломам удзельніка.

Разам з аўтамагазінам

Супрацоўнікі Быхаўскага РАНС дзеля таго, каб засцерагчы кожнага жыхара раёна. Гэтым разам яны выязджалі ў аддаленыя вёскі сумесна з работнікамі аўтамагазінаў. Ратавальнікі пагутарылі з вяскоўцамі, нагадалі аб асноўных правілах эксплуатацыі пячнога ацяплення і электраабсталявання, паводзінах у марознае надвор’е, звяртаючы асаблівую ўвагу на недапушчальнасць пакідання малалетніх дзяцей без нагляду дарослых, а для большай нагляднасці раздалі навучальную прадукцыю.

Курс — на супрацоўніцтва

Педагогі і навучэнцы Магілёўскага абласнога ліцэя №1 наведалі абласны ліцэй №5 г. Быхава. Яны пабывалі ў музеі 57-ай МРАД і здзейснілі аглядную экскурсію па ўстанове адукацыі, абмеркавалі план далейшага супрацоўніцтва.