АКЦЫЯ

У межах другога этапу рэспубліканскай акцыі «Бяспечны Новы год!» выратавальнікі Быхаўшчыны наведалі раённы цэнтр дзіцячай творчасці, дзе давялі да прысутных інфармацыю аб пажарах, нагадалі асноўныя патрабаванні бяспекі пры карыстанні піратэхнічнымі вырабамі, а таксама дакладны алгарытм паводзінаў у выпадку ўзнікнення надзвычайнай сітуацыі.

АДНЫ З ЛЕПШЫХ

На абласным конкурсе аператараў па штучным асемяненні жывёл, які праходзіў на базе БДСГА ў г. Горкі, у адной з намінацый быхаўчане занялі прызавое месца.Тэхнікі-асемянатары Людзміла Сілкова з ААТ «Валадарскі» і Людзміла Букетава з ААТ «Следзюкі» адстойвалі гонар раёна і атрымалі перамогу ў намінацыі «Вядзенне ўліку, стан працоўных месцаў». Ад «Магілёўскага Дзяржплемпрадпрыемства» ім уручаны каштоўныя падарункі. Апроч таго, за свае веды і майстэрства на працягу года яны будуць атрымліваць дадатковыя прэміі да аплаты працы.

АСЦЯРОЖНА: ЧЫГУНКА!

Супрацоўнікі раённага аддзела ўнутраных спраў сумесна з актывістамі РК ГА «БРСМ» правялі прафілактычную акцыю «Увага – зона павышанай небяспекі!». У раёне чыгуначнага вакзала арганізатары акцыі раздалі прахожым лістоўкі з інфармацыяй аб мерах засцярогі на аб’ектах чыгуначнага транспарту.

ПЕРАМОГI

Быхаўскі псіханеўралагічны дом-інтэрнат і Быхаўская раённая арганізацыя грамадзянскага аб’яднання «Беларускае таварыства інвалідаў» прынялі ўдзел у абласным конкурсе творчасці інвалідаў, які прайшоў у Магілёве. У намінацыях дуэт і вакал прызёрамі сталі быхаўчане Руслан Гаспаровіч, Андрэй Рамашэўскі і Аляксей Сцяпанцоў, а ў намінацыі дэкаратыўна-прыкладное мастацтва – Святлана Бутрымава і Аляксандра Сіднёва.

НАШЫ У ТЭЛЕВІЗАРЫ

Канцэрт-агляд калектываў мастацкай творчасці і індывідуальных выканаўцаў Прыдняпроўскага краю “З любоўю да цябе, Беларусь!” нядаўна прайшоў у Магілёве. У мерапрыемстве ўдзельнічаў народны фальклорны калектыў “Багатуха” раённага цэнтра культуры, а выхаванка дзіцячай школы мастацкіх рамёстваў Аляксандра Кухціна дэманстравала дзявочы касцюм другой паловы XIX стагоддзя. Тэлевізійную версію канцэрта быхаўчане маглі  пабачыць у нядзелю 18 снежня ў 18:10 на тэлеканале “Беларусь 4 Магілёў”.

ГУЛЬНЯ

У гарадской бібліятэцы-філіяле №49 пасяджэнне экалагічнага клуба прайшло ў выглядзе пазнавальнай гульні. Удзельнікаў вылучылі па выніках бліц-віктарын, а заданні былі распрацаваныя на аснове міфаў і легенд аб жывёлах. Кожнага ўдзельніка ўзнагародзілі медалямі “За імкненне да перамогі” і салодкімі падарункамі.