Дзе зліваюцца Друць і Дняпро
У нядзелю ў горадзе Рагачове прайшоў Дзень беларускага пісьменства. Ён быў 23-м па ліку ў нашай краіне.
Варта сказаць, што гэтае вялікае мерапрыемства распачалося яшчэ 31 жніўня, калі сюды з Мінска, ад Свята-Духава кафедральнага сабора, кранулася рэспубліканская навукова-асветніцкая экспедыцыя “Дарога да святыняў” з Благадатным агнём ад Гроба Гасподняга. І прыйшла ў літаратурную сталіцу ранкам 4 верасня.
2 жніўня шэраг мерапрыемстваў ладзіла Гомельская абласная бібліятэка імя У.І. Леніна: адкрыццё пастаянна дзеючай выставы “Па сапраўднаму народны”, прысвечанай народнаму пісьменніку Беларусі Андрэю Макаёнку; урачыстае адкрыццё Х Міжнароднага фестывалю-свята “Славянскія літаратурныя дажынкі-2016” і ўзнагароджванне пераможцаў абласнога літаратурнага конкурсу “Праваслаўе — мая надзея”.
3 верасня ў Нацыянальнай бібліятэцы Беларусі ранкам адбыўся міжнародны круглы стол “Сугучча: Слова Францыска Скарыны ў сучасным свеце”, за якім абменьваліся думкамі беларускія і замежныя пісьменнікі, а непасрэдна ў Рагачове з 12 гадзін пачалі дзейнічаць павільёны: “Сучасная беларуская кніга”, “Прэса Беларусі”, “Друкарня XVI стагоддзя” і г.д., адкрыўся святочны гандаль кнігамі.
Госці свята мелі магчымасць наведаць шэраг выстаў, прысвечаных 75-годдзю Уладзіміра Мулявіна, 500-годдзю беларускага кнігадрукавання, 95-годдзю Івана Мележа, 120-годдзю Кандрата Крапівы, 125-годдзю Максіма Багдановіча, шэраг іншых.
Знакавай падзеяй таго дня стаў мітынг памяці і ўскладанне кветак да помніка народнаму пісьменніку Беларусі Андрэю Макаёнку з нагоды ягонага 95-годдзя, наведванне музея Андрэя Ягоравіча.
Закончыўся дзень вялікім канцэртам творчых калектываў Гомельскай вобласці “Прысвячаем табе, Беларусь”.
Нядзельны дзень 4 верасня распачаўся пасадкаю Сада малітвы з Хрэсным Ходам да храма Святога Благавернага князя Аляксандра Неўскага і Божай літургіяй, пасадкаю алеі ў гонар 10годдзя Саюза пісьменнікаў Беларусі. Гэтым займалася таксама дэлегацыя пісьменнікаў Магілёўшчыны на чале з Уладзімірам Дуктавым.
На афіцыйнай цырымоніі адкрыцця Дня беларускага пісьменства да ўдзельнікаў вялікага свята звярнуліся з прывітальнымі словамі намеснік прэм’ерміністра Рэспублікі Беларусь і старшыня Нацыянальнага арганізацыйнага камітэта па падрыхтоўцы і правядзенні Дня беларускага пісьменства Наталля Качанава, міністр інфармацыі Лілія Ананіч, міністр культуры Барыс Святлоў, старшыня Гомельскага аблвыканкама Уладзімір Дворнік, старшыня Рагачоўскага райвыканкама Сяргей Дзенісенка, старшыня ГА “Саюз пісьменнікаў Беларусі” Мікалай Чаргінец.
З іх вуснаў тысячы прыйшоўшых і прыехаўшых на ўрачыстасць людзей, сярод якіх сустрэў нямала быхаўчан, пачулі, якая багатая на таленты Рагачоўская зямля. Яна ўзрасціла народнага пісьменніка Беларусі Міхася Лынькова, ужо ўпамянёнага народнага пісьменніка Андрэя Макаёнка, паэтаў і празаікаў Міколу Гроднева і Валерыя Гапеева, пісьменніка і драматурга Васіля Ткачова, літаратуразнаўцу і сатырыка Міхася Сліву (Кавалёва), шэраг іншых вядомых творцаў.
Рагачоўцы ганарацца тым, што тут падоўгу жыў і пісаў свае выдатныя творы Уладзімір Караткевіч.
Кульмінацыйным момантам урачыстасці стала ўручэнне Нацыянальнай літаратурнай прэміі ў розных намінацыях. У намінацыі “Проза” яе атрымаў пісьменнік Алесь Марціновіч, у намінацыі “Паэзія” — Мар’ян Дукса, у намінацыі “Дзіцячая літаратура” — Сяргей Давідовіч, у намінацыі “Публіцыстыка” — Мікалай Барысенка.
А якое ж свята без песен і танцаў? Таму яго ўдзельнікаў весялілі як прафесійныя, так і самадзейныя артысты.
Гледачы не шкадавалі сваіх апладысментаў народнаму артысту Беларусі Анатолю Ярмоленку, дзяржаўнаму ансамблю “Песняры”, вядомым кампазітарам і выканаўцам Алегу Елісеенкаву і Эдуарду Ханку.
Паўсюдна бойка гандлявалі рознымі напоямі ды прысмакамі, мастацкімі вырабамі і ўсім, што карыстаецца попытам у насельніцтва.
Чарговы Дзень беларускага пісьменства запланавана правесці ў старажытным горадзе Полацку, якому і перадалі эстафету свята.
Мікола ЛЕЎЧАНКА.