Ад Калядак — да Грамніцы
У цэнтры культуры, народнай творчасці і рамёстваў прайшло фальклорнае свята “Ад Калядак — да Грамніцы”, на якім хлопчыкі і дзяўчынкі пазнаёміліся з некаторымі зімовымі абрадамі і забавамі нашых продкаў.
У пачатку прадстаўлення дырэктар цэнтра культуры, народнай творчасці і рамёстваў Наталля Хамаўненка паведаміла аб тым, што беларускі народ вякамі ствараў свой вусны каляндар, у які ўваходзілі прыказкі і прымаўкі, прыкметы адносна надвор’я і будучага ўраджаю. Нам нельга забываць, што беларусы славяцца сваёй культурай і традыцыямі, якія трэба шанаваць, каб нашы дзеці ведалі, як жылі іх бацькі.
Зала была ўпрыгожана ў стыле вясковай хаты, развешаны ручнікі, дываны, стол засланы абрусам, а на ім — розныя стравы. Усё гэта дапамагло больш акунуцца ў атмасферу старажытнага часу.
Снежань, студзень, люты — не такія багатыя месяцы на святы і прысвяткі, але менавіта ў гэтыя месяцы мы ведаем самыя яскравыя святы — Каляды і Стрэчанне. Дзяўчаты разам са сваімі настаўнікамі паказалі, як яны святкаваліся на Беларусі нашымі продкамі. Прадэманстравалі розныя варожбы на саломінках, фасолі, кубках.
У канцы фальклорнага мерапрыемства мастацкі кіраўнік Алена Байкова падзякавала ўсім, хто прыйшоў сюды, пажадала здароўя і поспехаў, добрага настрою.
Вольга ПОЗДЫШАВА.